ZALEN November 9, 2024 : November 7, 2024 zana Meitei firfiak Arambai Tenggol ten Manipur Jiribam District-a zohnahthlakte chenna Zairawn-ah In 17 an hal bakah Ngurthansanga Hmar nupui Zosangkimi Hmar, kum 31 chu nasa taka sawisa in a ke ah an kah sak a, rawng taka pawngsualin an hal hlum zui hi Congress thalai chuan rapthlak tiin an dem takzet tih thuchhuah an siamah an tarlang.

Meitei firfiakten a nunna an laksak Zosangkimi pasal Ngurthansanga Hmar leh a fate Franky Lalchawisanga (kum 3), Victoria Laldomawii (kum 9) leh Lalringdiki (kum 7) te Congress Thalai chuan an tawrhpui a, Pathianin a thlamuanin a awmpui ang tih a ring a. Zosangkimi ralna hi Congress thalai chuan a hmunah hman an tum a ni.

Congress Thalai chuan, "Meitei helhoin kan unaute chunga thla sawm leh pariat chhung zet tharum an thawh hnuah MNF sawrkar khan engmah hmalakna a nei lo a, MNF sawrkar nasa taka dem a, Press Conference hial neitu ZPM sawrkar pawhin engmah hmalakna an sawrkar kum khat a tlin tep hnu pawha an nei lo hi Zohnahthlak unaute ngaihsak duh lohnaah a ngai a ni," an ti.

"November 2.2023 (Thawhlehni) khan khatih laia ZPM Working President leh tuna Home Minister K. Sapdanga chuan Aizawl Press Club-ah thuthar thehdarhtute kawmin, 'Mizoram-ah ZPM sawrkar a din hnu pawha NEDA hoin kan unaute an la sawisa chhunzawm zel a nih chuan, ralkhat atanga kut kuangkuaha thlir ngawt kan tlin ve pek lo ang, a hen tawk tala kan unaute thlavang kan hauh ve pawhin, min dem bik lo turah kan ngai,' tih thu a sawi a, 'BJP Meiteiho sapatal vanga kan unaute tawrhna rapthlak tak hi, a hmuna tlawh awm taka ngaih, la tlawh lo awmchhunte chu Pu Modi-a leh Pu Zoramthangte deuh chauh hi an ni tawh awm e. Pathian leh mipuite zarah ZPM hi a lo sawrkar ve hlauh a nih chuan, Manipura kan unaute hian Mizoram sawrkar hotute hmel an lo hmu thuai ang," a ti bawk.

Congress thalai chuan, "Kum khat dawn sawrkarna an chelh hnu hian Manipur-a kan unaute tawrhna hmu turin amah Home Minister K. Sapdanga ngei pawh a la kal chuang bik lo hi mipui zah lohna leh a rintlak loh zia a ti chiang a. BJP an mawngzawm ruk zia a nemnghetah Congress thalai chuan a ngai a ni. Hetiang thil rapthlak tak thleng hi Congress thalai chuan a en liam ve mai mai dawn lo a, ZPM sawrkar hian Manipur BJP sawrkar a hmachhawn ngam lo a nih pawhin Congress thalai chuan hma a la dawn tih ZPM sawrkarin lo hria se a duh a. Manipura kan unaute tawrhna a hmunah ngei kal leh tur leh Zosangkimi ralna hi Congress thalai chuan a hmunah ngei a hmang dawn a ni," a ti.