ZALEN October 30, 2021 : MPCC Chief Spokesman Ronald Sapa Tlau, Ex MP chuan tun hnaia BJP ten sawrkar-ah an tel dawn tih an sawi fo leh BJP National President JP Nadda ten MNF sawrkar SEDP hnuaia eirukna tam lutuk an sawrkar chuan an chhui dawn tih an sawi leh MNF ten Delhi lam BJP ten hmelma do taka an do thu an puang chuan awmzia thui tak neia a rin thu a sawi.

Ronald Sapa chuan, "Mizoram politics zirmi ten BJP Party chuan a tam berah Mizoram Assembly seat 6 bak an hmu lo ang, an tih mek laia hetia BJP-in an candidate 1 Dy. CM a nih tur thu an puan hmak ngam atang hian thil 2 chiang takin kawh a nei awm e. Tun hnaia an rawn beih mawlh mawlh tak Party (MNF) ni lo, Regional Party dang thawhpui atana biak rem an nei tawh a niang," tiin, "An biak fel Party chuan CM Post an chanin an lungawi a ni tih leh Dy. CM post pekchhuah pawh an lungawi a ni tih hi a ni," a ti bawk.

MP hlui chuan, "BJP Partner tur atan tun dinhmunah hian MNF ni lo, thawhpui theiha an neih dang chu ZPM chauh an ni hrih si a. Chutih laia kan ram, hnam leh sakhua min tihchhiat sak vek tum mek tu, BJP an la sawichhe hauh lo te hian mipui mak tih a hlawh hle a ni," a ti bawk.

MPCC Chief Spokesperson chuan, "BJP in an thawhpui tur an rawn ti-ualau ta mai hian mipui mak tih a hlawh hle mai a. An thawhpui tur an rawn tarlan te tan phei chuan an tawmna buka Atomb Bomb rawn thlak ang hialah an ngaih pawhin a mak miah lo ang. Modi-a Mamita a rawn zin chuan an thawhpui turte tan hlawkna aiin chhiatna lam a thlen an hlauh vanga lokal lo tura zuk ngen an awm a nih hi rin a ni," a ti.