ZALEN March 20, 2026 : Mizoram Pradesh Congress Committee chuan vawiin khan Political Session an nei a, he huna thusawitu pakhat MPCC Gen.Secy leh Spokesperson Dr. Lalianchhunga chuan Chief Minister Lalduhoma chu Hindu pathian Durga fakna leh chibai bukna a tel niin a sawi.

Dr. Lallianchhunga chuan, “Hindutva thlipuiin min rawn nuai tan ta a. Tun hmaa insawithaihna ang leka kan inpuh thin kha, tunah chuan a tak takin a rawn thleng ta a ni. Kan Chief Minister, Kohhran Upa ni bawk, Pu Lalduhoma ngei pawh Hindu pathian Durga fakna leh chibai bukna ah loh theih lohin an din tir a ni. Minute 3:10 a rei sak tur an rawn tih, Vande Mataram chang 5-na ah hian Hindu pathian Durga fakna leh chibai bukna a awm a. Hei hi kan dodal ngam loh chuan thangtharte rilruah Kristianna lungphum hi sawi thiahin a la awm ngei ngei dawn a ni. Kan Kohhran te pawhin he thil hi ngun taka min lo ngaihven sak turin ka sawm a. Congress party kan thlawp loh chuan Mizoram a party zingah Hindutva thlipui kengtu Central BJP dodal ngam an awm lo, Congress party kut kan tihchak a ngai a ni,” a ti.

MPCC Spokesperson chuan, “Chief Minister thutthleng hi a zahawm zia kan hre vek a, thu belhchian dawllo sawi mai maina hmun tur a ni lo tih kan hre vek a ni. Kan Chief Minister chu a Minister pakhatin Assembly House chhungah a rawn phawrh fai ta kelh mai a, UNNATI Scheme hnuaiah kan CM te chhungkua hian tanpuina subsidy an lo dawng reng reng lo tih a rawn sawi ta a. Kan CM khan, amah interview tu Journalist kha CM thutthleng atangin a lo dawngsawng tih kan hmuin kan hre vek si a. ZPM sawrkar hnuaiah hian CM thutthleng hi kan tibawrhbang zo ta tihna a ni” a ti bawk.

Politics-ah pawh mipuite’n thudik kan zawn a tul thu sawiin, Dr. Lallianchhunga chuan, “Party te kan inbeihna phenah hian thudik a zawn theih a ni. Ruling party zarzotu te chuan thudik an zawng lo va, anmahni contract petu an pute chu engtiang pawhin lo tan mah se, mipuite zawk hian politics-ah thudik i zawng hram hram zel ang u. Awihawm taka thusawi thiam ringawt hi kan ramin a thatpui lo. Ram hruaitu tur chu thusawi thiam lo deuh pawh ni se, dawt sawi mai hreh lo te ai chuan kan thlan ngam a hun tawh a ni” a ti.

ZPM sawrkar hnuaah sawhthing chingtute an mangang hle tih sawiin, Dr. Lallianchhunga chuan, "ZPM sawrkarin Buyers' Market an siam a. Sawhthing chingtute hi a ba a sawrkar hnena hralh aiin a man pe nghal thei hnenah hralh lo thei lo dinhmunah an din tir a ni. Buyers' Market hi thiah loh chuan sawhthing chingtute dinhmun hi a chhe zel ang," a ti bawk.