ZALEN August 11, 2026 : Hlimen Local Council leh All NGO te chuan Lalsavunga Park enkawl dan chungchangah duhkhawp lohna an neih thu an sawi a. Department-in August 2026 ral hmain Contractor contract a cancel loh chuan Lalsavunga Park chu mipuiin an tlawh theih loh turin dan an tum thu an sawi.

Hlimen Local Council leh All NGO thuchhuahin a tarlan danin Hlimen veng chhunga Directorate of Local Administration, Rural Development & Administration Department hnuaia awm Lalsavunga Park enkawl danah hian Department leh Contractor, Oasis Lalruattluanga te inkarah Deed of Agreement siam a nih laiin, agreement-a thil tarlan thenkhatte chu a bawhchhia niin an sawi a ni.

RTI chhanna an dawn atangin, Contractor-in kum tin Department hnena a chhun luh tur ₹20,00,000 leh 6.5% compound interest hi kum 1-na leh kum 3-naah a pe kim lo niin an tarlang. Kum 3-na, August 2025 atanga August 2026 chhunga chhun luh zat chu ₹5,67,122 chauh niin an sawi.

Agreement-a tarlan angin Park vawn fai, bungrua enkawl, kum tin vawi hnih sam fai leh Park infrastructure te rawng hnawih leh siam thatna tihhlawhtlin turte pawh mumal taka kalpui loh niin an sawi. Bridge leh construction work dangte enkawl danah pawh him lohna an hmuh thu an tarlang.

Agreement bawhchhiatna chungchangah Department-in hma lakna a neih loh thu an tarlang bawk.

Lalsavunga Park hi ram chhung leh ram pawn atanga tourist tam takin an tlawh thin avangin Mizoram hmel lanna pawimawh tak pakhat a nih thu an sawi a. Park hi enkawlna fel zawk neia siam that leh humhim tura Department-in hma la thuai turin an ngen a ni.