ZALEN Dec 19, 2025: Vawiin, December 19, 2025 Zirtawpni chhun khan, Central YMA OB-te leh CYMA Road Monitoring Committee ten lenga an sawm angin, BRTF (Project Pushpak) hotute leh Contractor, BRN Infrastructures Pvt. Ltd. hotute chu CYMA Office-ah kal, hna ṭha zawk leh chak zâwka an thawh dan turte sawiho pui an ni.

KSD Road siam mek hi a ṭhat loh em avangin, hemi kawngin a paltlang khuaa YMA Branch-te chuan CYMA-ah an lungawi lohna an thlen a. Chumi bawhzui chuan, CYMA Road Monitoring Committee Member-te chuan December 16, 2025 khan kawng siamtu BRTF hotute leh Contractor te nên Joint Inspection an lo nei tawh a. Hemi ṭum hian Contractor-in ṭha zawka hna a thawh dan tur mumal zawka a inruahman hma chuan, hna thawk chhunzawm tawh rih lo tura tih a ni a. Chumi bawhzui chuan vawiin chhun khan CYMA OB Room-ah hmalak dan tur sawiho leh a ni ta a ni.

Vawiin meeting-ah hian BRTF leh Contractor te chuan an ruahmanna thar leh, hna ṭha zâwka an thawh dan tur ruahmanna an siamte an sawi a. CYMA hruaitute pawh ṭha tihpui phawtin, chak taka hna thawk chhunzawm nghal tur leh; an hnathawh quality leh progress te a hmuna endik leh turin, January 10, 2026 (Inrinni) chu a ruat nghâl a ni.

Meeting-ah hian Central YMA Road Monitoring Committee hi CYMA President R. Lalnghetan a ho a. BRTF lam hi Sanjay Kumar, Commander, 24 Task Force in hovin, Contractor, BRN Infrastructures Pvt. Ltd. lam hi Vishnu Jangra, Project Manager in a rawn ho bawk a ni.

#ZalenNews