ZALEN, Nov. 30, 2024: Sikkim batter-te hmaah captain Johan Lalbiakkima leh PC Zothankima ten an ball vawm thiam an lantir a, Lalramluahpuia Zote (Mapuia) vuak that nen Mizo rawltharten Cooch Behar Trophy khelh mekah Sikkim chu thawh khat leh run 63-in an sawp.

Board of Control for Cricket in India (BCCI) buatsaih, India rama state/association hrang hranga mipa kum 19 hnuai lamte inelna sang ber (first class under 19), Cooch Behar Trophy 2024-25-ah hian Mizoram hian an group-ah vawi hnih hnehna an channa niin team ruk awmah palina an ni mek.

Cooch Behar Trophy hi ni khat aia rei (multi days) khelh chi a ni a, team khatin thawh (innings) hnih zel an nei.

Mizoram hi Sikkim nen hian Gokulbhai Somabhai Patel Stadium, Nadiad, Gujarat-ah Ningani atang khan an khel tan a. Sikkim hi thum vawrah chakin vawm hmasak an thlang.

Mizo rawltharten tha taka bul tanin opener Lalhlimpuia’n run 52 a vaw chhuak a. Cricket Association of Mizoram (CAM) Emerging Player of the Year Mapuia run 150 zet a vaw chhuak bawk a. Run 355 an tlinah mi pakua thiin an duhtawk (declare).

Sikkim-in an vuak thawh khatnaah Mizoram captain Johan-a leh Zothankima an ngam lo hle a. Johan-a’n panga vawm hlumin Tlangnuam bowler hian wicket li a la bawk a, Sikkim-in run 89 chiah an tlin thei.

Mizoram run siam an um phak lohna a tam em avangin Siikim hian an vaw zui nghal (follow-on) a, hetah pawh hian run 203 chiah an tlin thei.

An vuak thawh hnihnaah pawh Sikkim batter-ten an ngam loh ngai bawk ngam lovin Zothankima’n wicket nga la lehin Johan-a’n pathum a vawm hlum leh bawk.

Mizoram thawh khat vuak chhuah hi Sikkim hian vawi hnih thawhah pawh run 63 laiin an la phak lo cheu va, Mizo rawltharte hi thawh nawn leh pawh ngai lovin an chak a ni.

Mizoram hian Arunachal Pradesh chu wicket riatin an lo hneh tawh a. Plate Group-ah final (a sang pahnih) luh beiseiawm tawh chiah lo mah se season khata vawi hnih chak hi Mizoram tan result tha tak a ni.

December 6 atang hian Cricket Association of Puducherry Ground 2, Puchucherry-ah Pondicherry (BCCI-ah an hming an la thlak lo) an hmachhawn leh dawn a ni.