ZALEN, Nov. 8, 2024: India rama rawlthar kum 19 hnuai lamte cricket-a an inelna sang ber, Cooch Behar Trophy Under–19-ah Mizoram rawltharten Zirtawpni khan Arunachal Pradesh chu ni khat chuang hmang bângin wicket riatin an hneh a. Mizoten hnehna an chan hi wicket 13 zet latu, Johan Lalbiakkima vawm that zar leh century vaw chhuaktu, Lalhlimpuia zar a tih theih.

Gokulbhai Somabhai Patel Stadium, Nadiad, Gujarat-ah Nilaini atanga inkhelh tanah hian Arunachal Pradesh hian vaw hmasain runs 181 an tlin a. Hemi tum hian Cricket Association of Mizoram (CAM) Junior Cricketer of the Year ni lai, Ramhlun Venglai rawlthar, Jonathan-a hian mi pasarih zet a vawm hlum.

Mizoram vuak hun a thleng a, beisei anga vaw chhuak tha lovin run 92 chauh an tlin thei a, wicket keeper Lalramluahpuia Zote (Mapuia) chu run siam hnem ber niin team pum pui thawh chhuah zahve aia tam, run 45 vaw chhuakin an run siam tlem lutuk tur lakah a chhanhim.

Arunachal Pradesh hian an vuak thawh hnihnaah run 112 chauh an tlin leh thei a, hetah pawh hian Johan-a bawk langsar lehin mi paruk zet a vawm hlum leh.

Arunachal Pradesh-in thawh hnih (1st leh 2nd innings)-a an run siam belhkhawm hi run 293 niin an thawh hmasaka run 92 an neih tawh sa nen Mizoram hian chak turin run 202 an siam a ngai a, hei hi Ningani chawhnu atang khan um tanin Zirtawpni chawhma khan mi pahnih chauh hlauhvin an umphak a, chiang takin hnehna an chang ta a ni.

An vuak thawh hnihnaah hian Mizoram tan hian Ainawn Veng, Aizawl rawlthar, Lalhlimpuia chuan century siamin run 112 a vaw chhuak a, a tawp thlengin a dam.

Ramthar Veng rawlthar, F Lalnunkima’n run 58 vaw chhuak bawkin hahdam taka an chak theihna bul a ni tel a. An vuak hmasaka run siam tam ber, CAM Emerging Player of the Year Mapuia’a pawhin thi lovin run li a siam leh hman bawk.

Cooch Behar Trophy hi Board of Control for Cricket in India (BCCI) hnuaia state/association-ten mipa kum 19 hnuai lamte inelna atana a buatsaih thin a ni a. Inkhel pakhat hi ni li chhunga khelh zawh hman tura ruahman niin team khatin vawi hnih thawh zel an nei a. Mizoram hian Inrinni nileng leh Zirtawpni chawhnu zawng hun awl hmang bângin hmarchhak state-pui hi an hneh hman a ni.