ZALEN October 3, 2025: AMC Ward-X Corporator Chuauzikpuii Pachuau chuan vawiin khan AMC Fund leh Property Tax hmanga siam Futsal Ground, Zotlang ah a hawng. AMC Corporator zingah Futsal Ground siam a, Turf phah thei hmasa ber a ni.

Futsal Ground hawngtu Corporator Zikpuii chuan thusawiin, "Ward-X huamchhunga thalai leh naupang infiammi hmabak eng tak tak nei te'n veng dang pan lova mahni Ward chhung ngeiah thlamuang taka inkhelhna tur hmun ṭha an neih hi ka awhsak em em ṭhin a, chu rualawhna chu field puitlin ngei tura min nawr kaltu a ni," a ti. 

Zikpuii chuan, "Ward chhungah Fund insem a ngaih avangin ṭum khatah Fund hmanga siam zawh nghal rem lo mah se, Ward chhunga infiammite infiamna tur sual chhuah ngei ṭul tihna avangin kum 2023 aṭang khan a tahtawla hma lak chhoh zel a ni a, kan Ward chhunga cheng mi pakhat chauh pawhin football emaw, futsal emaw hmanga eizawng thei khawpa thiamna nei an lo chhuah phah ngei beiseina sang tak nen he field hi theihtawpin kan sual chhuak ve a ni," a ti.

Vawiina hawn tak Futsal Ground hi 'Zotlang field - cheng 5 field' tia hriat thin niin, kum 2023 atang khan Futsal Ground puitlinga siam turin AMC Ward Fund hmanga cheihnum hna thawh tan a ni a. Futsal Ground puitling ni tur leh Turf phah nana hna tul zawng zawng thawh zawh hnu July thla, 2025 khan SDA Impex Pvt., Maharashtra te'n Turf hi an rawn phah tan a. Vawiin October ni 3, 2025 hian hman theih tura hawn a ni ta a ni.

He Futsal Ground hi a dung ft 43, a vang ft 23 a zau a ni. Ground cheihnumna senso hi Corporator Funds cheng 17,22,200 leh, Property Tax Return cheng nuai 15 senga siam a ni a. Bul tan tirhin Bialtu MLA hmasa Zothantluanga fund (MLA) cheng 5,06,353 hman a ni bawk. Tin, Futsal Ground Pavillion sakna atan hian Zonunmawia te chhungkuain an unaupa Lianhmingthanga hriatreng nan cheng Nuai 3 an donate a, Ground Lights leh a tuaihnum hna hi Zotlang Local Council te'n LC sum hmangin an thawk bawk a ni.