• Lalchhandama Colney
  
• Kan thupui han en hian tu ber nge mawhpuh tur kan zawng nghal mai thei. Mawhpuh tur kan zawng kan zawng a, mahni erawh inen a har duh khawp mai. He thil hi thil buaipui awm tak mai a ni a, hnamin, ramin a buai phah thin a nih hi.
  
• Khawvel ram zau zawkte han thlir ila, rinawm awm tak tak, sap kan tihhote zingah pawh hian a thleng ve fo thin niin a hriat.
  
• Transparency International’s Corruption Perception Index (CPI)-i a May, 2019-a a tar lan danin heng ram - Somalia, Syria, S.Sudan ti te hi khawvela a hluarna ber niin a sawi. Keini ram (India) hi 79-na (2016), 81-na (2017), ram 180 an survey-naah kan dinhmun a ni.
  
• Europe ramte hi chu tha viau tura rin an nih laiin Russia ram pawh an nasa ve hle tih kan hre hlawm ang. An zingah hian Ukraine ram chu a hluarna ber a ni (CPI).
  
• Hetih lai hian Denmark ram chu khawvela fihlim ber a ni. Vawiina kan thupui sawi turten engtin nge corruption kan do ang, hma lak dan tur, etc. min siamsak theih ka beisei.

Ni tin Nunah: Nun dan inang lo tak takte kan ni hlawm ang. Sakhaw mi chuan ni tin tawngtaina nen bul tanin buaina karah pawh thil tha tih a tum hram hram thin ang. Sakhaw mi vak lo chuan a changin tawngtaina nen, a changin duh duh danin a nunte a hmang ang. Khawvel lam mite pawhin thiam takin sual rawng an bawl ang a, hlawhtlinte pawh an hlawhtling viau thin ang. Heng mite hi chu chiang sa, remchang a awm phawt chuan, thil dik lo tih chu, mak turah ngai lem lo ila.

Hetih lai hian mi tam zawkte hi chu mi tha, fel tak tak te kan ni a, eng emaw takin min mawlh thutte a nih loh chuan dik lo takin thil kan ti duh lem lo.

Dik tak leh fel taka tih chu kan duh dan a nih laiin a chang chuan kan zawm hlei thei thin lo. Eng vang nge ni ang? Dawt, dawt var kan tih thin maite hi kan sawi nasa thin a ni lo maw, ngaih zam theih, pawm zam theih te hi kan ngah thin a ni lo maw?

Dawt emaw han sawi ngaih chang hi chu kan ni tin nunah a awm ve fo thin a; mahse, hei pawh hi dawt sawi ai chuan a dik tak han sawi dante kha a awm thei tho em aw?

A lang a pauvin ei ru lo mah ila kan rilru leh ngaihtuahnate hi a dik lo, kan thil thlir dan leh a changa thil kan pawm dante hi a dik tak chuan a corrupt sa riau ve a ni.

Ei zawnnaah: Kan ei zawnna runpui ber chu lo neih a ni a, kan ram economy innghahna ber erawh sawrkar hnathawkte an la ni reng a ni.

Sumdawng, dawrkai lian tak takte pawh kan awm ve nual tawh a, dawr siamte phei hi chu tun hnu hian kan intihhmuh ta deuh emaw ni chu aw a tih theih.

Lo neia ei zawngte an pawimawh hle a, anni hi kan ni tin ei tur chaw leh a dangte thawk chhuak thinte an ni.

Dik lo taka thil tih chungchangah eng mah sawina tur awm lo mah se, tun hma kha chuan sawhthing chungchangahte an hming a hliau ve hle. Tun hnu pawh hian pesticide, etc. hman chungchangah pawh sawi neuh neuh a tam thin ve hle.

Dawrkaite pawh a chang chuan an thil tih dik loh thuneituten an man thu kan hmu fo thin bawk ang.

A hnuhnung berah chuan sawrkar hnathawkte kan langsar hle, ram hmasawnna tur engkim thawktute kan ni. Kan rinawm loh chuan nasa takin ramin a chhiat phah thei a ni.

Awle, kan ni tin ei zawnna theuhahte ngun takin inbih let ta ila, ‘hei chu aw,’ han tih emaw, ‘he lai hi chu aw,’ han tih vawng vawngte emaw kan nei thin a nih hi.

Sual A Ni: Chanchinbu, T.V. etc. atangte kan thlir chuan sualna buru tak tak, thinthawng tak takte kan hre thin a nih hi.

Khua a lo pui chho zel a, mihring kan pung zel a, heng sualna rapthlak tak tak kan tih thinte pawh hi ngaiah kan nei chho tan a ang hle mai. Mi pahnih khat lo tualthite hi chu eng hu-ah vak mah kan ngai tawh lo, mitthi hrim hrimte phei hi chu awm ve deuh reng turah kan ngai a ni deuh ber tawh mai.

Ruihhlo hman sualnate pawh kan tuar nasain min tibuai theuh mai zawng a nih hi.

Rukruk, etc. te pawh a hluar hle a, tunah chuan biak inte pawh a him tawh chuang lo. Heng kan han sawite bakah hian a dang pawh a la tam ang, rilru an tibuaiin min tihrehawm thin hle mai.

Sualna chuan bu nghet takin a khuar a, ‘a va pawi ve aw,’ kan ti vawng vawng thin a nih hi.

Hetih lai hian kan hlawkna tur a nih dawn phawt chuan pawi kan tih em em loh, dik lo deuh a thiltih, thamna emaw cheng tlem tê han lak ve mai mai te, ngun taka ngaihtuah peihte chuan thil dik lo tak a ni tih an hria ang. A liantham, ram hnuk han khawih pha chin angah phei chuan a va pawi dawn em, sualna rapthlak tak a lo ni ve reng a ni.

Corruption kan do nasa, khaw khat, veng khata lak luh mil lova khawsate chu ‘a ei ru nasa,’ kan ti a, kan sawi luai luai thin.

Hetih lai hian a finfiahna tak tak erawh kan nei ngai lem lo, han man chhuah tak tak pawh hi sawi tur em em kan la nei lo.

India ram hi ei rukna hluarna ram ve pakhat a ni ti ila kan sual em em lo vang. Mahse, kan ram hi corruption nasatna state zingah a tel lo ve tlat, heng - Tamil Nadu, Telegana, Punjab etc. te hi CMS Survey Report 2018-in a tar lan dan chuan top three an ni hlawm.

Corruption hi a pawi a, ram tichhhetu a ni, chuvang chuan sawrkar pawhin a do nasa hle a, ei rute na taka hrem thei turin Lok Ayukta-te pawh a din a ni.

A do kawngah hian mi tinten tihtheih kan nei theuh a, kan tihtheih erawh a inang lo.

A bul berah chuan, tute tih dan takah emaw mi tinten kan ngaihtuahna kan pianthartir a ngai; tichuan, a zung chawpa pho ro kan tih thin chu a takin a thleng thei ngei ang.

Hawh u, ei rukna i do tlang ang u.