Aizawl: K.Sangthuama MLA chuan, “MNF kan sawrkar a nih chuan corruption awm lohna sawrkar kan din dawn a ni,” a ti. MNF-in ‘Vangpui Fehchhuah’ an hman kal zelah nimin tuk khan Sairangah hun hman a ni a, thu sawitu K.Sangthuama chuan, “MLA tumah hi i corrupt tih an ngai lo. Kum 10 dawn MLA an nih chhunga in leh lo ropui tak tak an din atangin kan hrethiam vek a ni,” a ti a. “Mi rethei khai chhuah hi MNF-in kan tum a ni a. Kan ramah in ropui tak tak sain kawng tha tak tak siam mah ila, a chhunga cheng mipuite kan ril a tam tlat chuan awmzia a awm lo a ni,” a ti. MNF Thalai Vice President Lalremruata Chhangte pawhin thu sawiin, “Mi retheite kan VIP an ni titu Pu Hawla chu a helicopter tumna tur sam faiin an VIP-te an hnatlang a, an nawmchenna hmanruaah min hmang a ni,” a ti bawk.