Aizawl: Kumin January thla atanga August 2016, thla 8 chhung khan COTPA (Cigaratte and Other Tobacco Product Act) bawhchhia mi 858 man an ni. National Tobacco Control Programme hotute hnen atanga Zalen thudawn danin kumin January atanga August thla chhung vek khan Anti Tobacco Squad te chuan phallohna hmuna meizu an awm leh awmloh tum 177 an enfiah bakah dan bawhchhia a zawrh cigaratte cartoon 9516 leh packet 2192 an man tawh bawk. Thla 8 kalta chhung vek khan zirna in hrang hrangah zuk leh hmuam thatlohzia inzirtirna tum 345, Kohhran ah tum 57 an nei a. Hmun hrang hrangah training/workshop tum 72 an nei bawk. Zuk leh hmuam nghei duh ten an pan tura siam 'Tobacco Cessation Clinic' chu April 2016 atanga August 2016 chhung khan pantu mi 2423 an awm bawk a ni.