ZALEN August 18, 2026: Chief Minister Lalduhoma kaihhruainain vawiin khan Chief Minister Office-a Cabinet Room-ah Council of Ministers hukhawmin ram hmasawnna leh enkawlna kawnga thurel pawimawh tak tak an pawm.

Cabinet meeting-ah hian School Education Department kaltlanga school te provincialise-na dan leh hmanraw tih awlsam a, sikul tam zawk sawrkar kuta an awm theih nana Rules ennawn (revision) leh he thila sum leh pai senso ngai tur zat lo zirchian ni se tih pawm a ni a, heng thil te hi Council of Ministers meeting lehah zirchianna te nena ngaihtuah leha chhawp chhuah zui a ni dawn a ni.

Sawrkar Flagship Scheme 'Bana Kaih' hnuaia entrepreneur-te leh loan latu ten awlsam zawka loan an lak theih nan leh Manifesto-a Development Bank siam tura intiamna tihhlawhtlinna atan Mizoram Development Finance Corporation din chu pawm a ni. He corporation hi sawrkar thuneihna hnuaia awm lo independent body anga kalpui tur niin, a puitlin nan Interim Committee din phawta chu committee chuan thil tul te buaipui tura ruahman a ni.

Additional agenda lian tak tak zingah Rural Development & Administration Department (RD&A) hnuaia Mizoram Viksit Bharat: Guarantee for Rozgar and Ajeevika Mission (Gramin) rules hrang hrang te, Mizoram Shops and Establishments (Amendment) Bill 2026 te, leh Health & Family Welfare Department hnuaia Mizoram Medical Council amendment bill leh rules hrang hrang te pawh Cabinet chuan a pawm bawk.