ZALEN August 10, 2026: Chief Minister Lalduhoma kaihhruainain vawiin khan Chief Minister Office Cabinet Room-ah Council of Ministers (Cabinet) chu an thukhawm a, Mizoram Hnam Hla (Official State Song) atan Rokunga phuah 'Ro Min Rel Sak Ang Che' tih hla puan a nih bakah ram leh hnam tana thil pawimawh te an pawm.

Thawhtannia Cabinet meeting-in thutlukna a pawm langsar zual zingah, Rokunga phuah 'Ro Min Rel Sak Ang Che' tih chu Mizoram official State Song atan a pawm a. Tualchhung chanchinbu (local newspaper)-te tana sawrkar thu leh fakna (classified & display advertisement rates) tarchhuah man tihsang nan Information & Public Relations (IPR) Department ruahmanna a pawm bawk.

Mizoram Floodplain Zoning Bill, 2026, Mizoram Goods and Services Tax (Second Amendment) Bill, 2026, Mizoram Land Survey and Settlement Operation Bill, 2026, Mizoram Micro, Small and Medium Enterprises (MSME) Bill, 2026, Mizoram Industrial Area (Amendment) Bill, 2026 leh Mizoram Fire Services (Amendment) Ordinance & Bill, 2026-te chu Assembly-a put luh tura pawm a ni.

Mizoram New Defined Contributory Pension Scheme (NPS), 2010 hnuai a subscribers-te hamthatna tihchhuah leh tih that nan Finance Department ruahmanna a pawm a; Mizoram Lokayukta Inquiry Wing-a Police depute-te tan Basic Pay atanga 12% Special Incentive Allowance pek a pawm bawk. 

Sawrkar daktawr (Government Doctors / Mizoram Health Service)-te tan Non-Practising Allowance (NPA) pek dan structured implementation duan chu a pawm a, Mizoram State Commission for Protection of Child Rights hnuaia provisional leh contract employee pakua-te regularisation dilna leh Right to Public Services Act, 2015 amendment te pawh a pawm a ni.

Land Revenue & Settlement (LR&S) Directorate leh Directorate of Registration & Stamp te chu Directorate of LR&S hnuaiah awm kawp (amalgamation) tura thutlukna siam a ni a. Mizoram Electricity Regulatory Commission (MERC) atangin post thar paruk siam leh JERC atanga officer leh staff post 15 retained-te absorption a pawm a, MERC Chairperson atan Benjamin L. Tlumtea ruat tura absorption pawm a ni. Ainawn Vengah State Bank of India (SBI) hnenah sawrkar ram inremna fel tak pe tura proposal pawh a pawm bawk.

Heng bakah hian Mizoram Occupational Safety, Health and Working Conditions Rules, 2026, Industrial Relations Rules, 2026, Legal Metrology Rules amendment, Public Procurement Rules amendment, leh Private Middle, High leh Higher Secondary School Rules, 2006 amendment-te pawh Council of Ministers chuan a pawm bawk a ni.