May 15, 2023; Special Judge (PC Act) Dr. HTC Lalrinchhana chuan NRHM, Mission director hlui Dr N. Palai chu kum 4 jail tang tur leh cheng nuai 24 chawi turin a hrem a, EE Lalsangliana pawh kum 1 tang tur leh cheng nuai 6 chawi turin a hrem.

Special Judge (Prevention of Corruption Act) hian vawiin May ni 15 hian thiam loh a a chantir tawh mi pahnihte hremna tichhuak a, National Rural Health Mission (NRHM) a Mission Director hlu Dr. N. Palai chu kum 4 chhung tang tur leh Rs. Nuai 24 chawi turin a hrem a, pawisa a pe thei lo a nih chuan kum 12 chhung tan belh tur a tih a ni.

Directorate of Health Services a EE ni thin Lalsangliana Chhakchhuak pawh kum 1 tang tur leh Rs. Nuai 6 chawi tura hrem niin, pawisa a pe thei lo a nih chuan kum thum chhung tan belh tur a hrem a ni.

Dr. N Palai leh Lalsangliana Chhakchhuak thubuai hi Ministry of Health & Family Welfare hnuaia NRHM - III Division ten Aizawl Civil Hospital tih changtlunna tur sum kum 2007 a cheng Vbc. 10 Mizoram Health Society an rawn pek tih chingpen thubuai a ni.

He thubuai hi Vigilance Department Deputy Secretary, Government of Mizoram in ni 20.4.2012 ah CBI hnenah thubuai a put luh atangin irhchhuak a ni. Thubuai thehluhna ah chuan Rs. Vbc 5.74 zet hman khawloh anga tarlan a ni.

THUBUAITE :

(i)  T. Ruata r/o Republic Veng Aizawl hming hian Aizawl Civil Hospital compound hung thatna tur pawisa hi pek thin a ni a, a vaia pawisa pekchhuah chu Rs. 19,78,000 zet a ni a, he T. Ruata tih hi hmuh zawh a ni lo thung.

(ii)  M/s Vulmawi Art Works neitu pa Pu Lalbuta hmingin cash memo-te siamin Spiral Binding Machine & VHSL Folder-te leina man Rs. 2,56,350 zet chu hmangral anga bill siam a ni a, chutih laiin Pu Lalbuta hian engmah a hriat loh thu leh he khawl hi hnuchhui laiin hmuh tur a awm loh thu tarlan a ni.

(iii) Warehouse sakna tura Architectural drawing siamna tur sum Rs. 7,12,469/- chu Anthony Zothansanga hminga sum hi pekchhuah a ni a, he sum hi thubuai neitu Pu Lalsangliana Chhakchhuak tan a chenna ina pe ngei a puh a ni.

Tichuan, pawisa chingpen zawng zawng zat chhuichhuah hi Rs. 29,48,819/-  (19,78,000/- + 7,12,469/- + 2,58,350/-)  a ni. CBI lamte chargesheet theh luh ang hian Court chuan ni 11.5.2017 khan section 420/468/471/477A r/w 120B IPC leh u/s 13 (2) r/w 13 (1) (c) (d) of PC Act, 1988 angin Dr. N. Palai leh  Lalsangliana Chhakchhuakte chungah hian thubuai a siamsak ta a ni.

Thubuai finfiahna atan hian CBI lamte hian thuhretu mi 38 zet Court-ah thu an chian tir a, thubuai neitu Dr. N Palai-a hian amah bakah thuhretu dang pahnih Court-ah thu a zawhchian tir. Lalsangliana Chhakchhuak ch8u ama tan thuhretuah a ding thung.

THUBUAI PAKHATNA : 
T. Ruata, Republic Veng Aizawl hming a Aizawl Civil Hospital compound hungthatna tur pawisa hi pek thin a ni a, a vaia pawisa pekchhuah Rs. 19,78,000 zet chungthuah hian court chuan Health Department atanga pawisa pekchhuahna bill leh bank cheque hrang hrangte leh T. Ruata bank account-a pawisa luh dante bakah thuhretu hrang hrangte thusawi atangin hemi a puhnaah hian, T. Ruata r/o Republic Veng Aizawl tih hrim hrim hi hmuh zawh a nih loh bakah T. Ruata hminga contract hna pek leh sawrkar sumpai tih chingpenna ah hian Dr. N. Palai hi ama tan emaw mi tu emaw duhsak bikna neiin sawrkar sumpai ti chingpena puhna hi CBI lam hian finfiahah ngaiin thiam loh a chantir.

 Chutihlaiin Lalsangliana Chhakchhuak erawh chu Dr. Palai nena inthuruala he sumpai hi tichingpena puhnaah a thiam lohna hi CBI lamin an finfiah zo lo tia thutlukna siam a ni thung.

THUBUAI PAHNIHNA
Dikhlel taka Lalbuta M/s Vulmawi Art Works neitupa hnen atanga Spiral Binding Machine & VHSL Folder Rs. 2,58,350 a leia puhna thubuaiah pawh, Dr. N. Palai hian Lalbuta hnen atangin cash memo la dah khah loh (blank cash memo) a lak thin thute, hetiang bungrua hi  M/s Vulmawi Art Works hian an neih ngai loh leh Health Department hnenah phei chuan an hralh hauh lo thu chu CBI lam hian an finfiah. 

Tichuan, Dr. N. Palai chu a ma tan emaw midang tan emaw pawhin a sawrkar hnathawhna chu dik lo taka hmanga puhna section 13 (1) (c) & (d) of the Prevention of Corruption Act, 1988 leh sorkar lehkha pawimawh tih dik loh luihna bakah lehkha pawimawh dikhlel hmang lui anga puhna angin section 471/477A of IPC hnuaiah thiam loh chan tir a ni.

Lalsangliana Chhakchhuak erawh chu Dr. N Palai nena inthuruala he sumpai hi tichingpena puhnaah a thiam lohna hi CBI lam in an finfiah zo lo ti a thutlukna siam a ni thung.

THUBUAI PATHUMNA
Rs. 7,12,469 JMT Architectural Services, Zarkawt, Aizawl neitu pa Joseph M. Thiak an PW-10 Anthony Zothansanga kaltlangin Lalsangliana Chhakchhuak hnenah ware house sakna tur hlimthla (drawing) ilo buaipuina tur man atangin a pe tih thuah pawh, he pawisa lo ruahman saka hma lo lak puitu hi Dr. N. Palai-a tho niin, he pawisa hi Lalsangliana Chhakchhuak hi pek ngei a ni tih hi CBI lam thuhretu te Pws 10, 13, 16, 25, 35 leh 37 na te thusawi hmanga finfiah a ni.

Bill lehkha hi Anthony Zothansanga hmingin a hriatpuina ni si lo va a hming sign lem hmanga siam a ni bawk tih finfiah a ni a. Heivang hian Dr. N. Palai leh Lalsangliana Chhakchhuak te hi section 13 (2) r/w 13 (1) (c) (d) of PC Act, 1988 r/w 120B IPC leh section u/s 471/477A r/w 120B IPC anga thiamloh chan tir an ni bawk a ni.