Covid 19 a darh zel lohna turin Mizoram sawrkar chuan dan a siam a, hemi dan tlawhchhan hian hmalak mek a ni a. Hmun thenkhatah khauh taka kenkawh anih laiin thenkhatah mihring an zalen hle thung a ni tih chanchin-thar lakhawmtute lam atangin a hriat theih a ni.

Kawngpui dung hmun langsar tam zawkah mipuiin dan an zawm thain a lang a. Hetih lai hian hmun biru leh penhleh zawk ah te dan hian zawm a hlawh tha lo niin a lang a, hei hi umzui vat a tha khawp mai.

Covid 19 kai kan zia deuhin a lang a, thawktute hnathawh rah leh mipui lam fimkhur vang pawh a ni ang. Mahse, dinhmun himah erawh kan la awm hauh lo a, hripui kaina hriat mai loh an awm ve reng a, fimkhur lehzual a ngaihzia tichiangtu a ni.

Zan lam curfew puan a nih avangin phalna neilote chu an chenna ina tawm tura beisei an ni a, hmun tam takah hei hi zawm a ni lem lo, pawn chhuak leh leng chhuak an awm fo tih a hriat a, a bikin kawngpui dung ni lem lovah an zalen phian bawk a ni. Tam tham si loa punkhawm siam a la awm fo te hi bawhzui ngai zingah ngaih pawimawh hmasak nise a tha khawp ang.

Tam tham si loa punkhawmna hi fimkhur ngai ber niin a lang hrih a, chhiat ni that ni, a bikin that niah thenkhat chu sawrkarin mipui awm dan tura a duan zawm tha lo nia report awm te pawh hi enfiah ngai tak a ni a. Mithiamte sawi danin tunlaia hripui darhna ber chu tam tham loa punkhawmna a ni lawi bawk si a.

Krismas leh Kumthar in min hmuak mek a, Kohhran lam chu ruaitheh leh puipun hun huaihawt lo tura ngen niin anni lam pawhin tih an tum lem lo niin a hriat tawh a. Hemiin a hrin chhuah tur chu zan curfew bawh chhe lo tawka tam tham si loa inhmuh khawm emaw chaw eikhawm emaw te a ni dawn a, hmalak a nih loh chuan a hluar zel bawk ang. Heng hmunah te hian fimkhur sen a har khawp ang. Hunpui a hnaia intihhlim châk tam tak an awm dawn a, thalai lam an ni zual dawn bawk a ni. ‘Kumin chu kan hun tawnin a zir ngang lo a ni’ tia insum tura inzirtir nge sawt anga inkaihhruaina dan khauh zawka siam emaw khap mai tihte pawh ngaihtuahnaah a awm a ni. Kan himtlanna turah chuan sawrkar hi a inthlahrung tur a ni lo ang.

Sawrkar task force lam indaih lo mahse veng tinin task force an nei vek a, heng mite hi Hunpui chhung hi chuan hman tangkai lehzuala, covid 19 darh zel tura dan siam kenkawh kawnga thawk theitu turte an ni. Kan tawn hriat atangin vawi khat chetsual a pawi thui theih zia kan hriat tawh kha.