Hripui hriat fiah hleih theih loh Covid-19 in khawvel a nuai mek a, ram changkang zawk leh hausa zawk lam pawhin tih ngaihna vak an hre lo tih theih a ni a, inkhuahkhirh a pawimawh rualin fimkhur taka he natna hi ka dawnsawn thiam erawh a ngai chho dawn niin a lang. Hlauhawm a nih rualin a hlauh dan lam kan inzir tir a tul hle a, kan nundan pangngai thin ang kha he hripui a rawn lan hnuah hi chuan kan chhunzawm thei tawh dawn lo tih a lang reng mai.

He natna hi hlauh chi a ni lo a, thihpui kan la neih loh vang leh a vei te an enkawl dan kan hriat atanga zuam ngawt chi pawh a ni hek lo. Chutih rualin thingtlang khaw tam tak leh khawpui thenkhat ten Aizawl lam leh phai lam atanga rawn haw te kan thinhrik lutuk dan erawh kan inenfiah a ngai. He natna hian eng tikah nge min kiansan dawn tih a hriat loh avangin inzirtirna tha kan mamawh a, a dawnsawn dan kan thiam a tul ta khawp mai.

Mihring hi chengho tura siam kan ni a, chuvangin in mamawh tawn vek kan ni. Tlang hrang hrangah chhungte leh laina kan nei vek hlawm a, chhiat tawk thei vek kan ni. Hnathawhna avanga hmun hrang hranga awm te kan ni hlawm bawk a, awmna ngaiah a awm reng theih loh, hri kan hlauh luata mi hnar ringawt mai te hi fuh lohna chen a awm thei a, mahni hmasialna lamah mi dang tan harsatna thlentu kan ni theih tih hi hriat tel a tul tak zet a ni. Sawrkar-in khua leh veng inenkawlna kawnga LLTF/VLTF kuta mawhphurhna thui tak a pek hian thui tak min chhan a tih ngam a, chutih rual chuan kan chet velna kawngah thenkhat tan buaina leh harsatna a tling thei tlat a ni.

Khaw thenkhatah te phei chuan Covid-19 test result nei thlap pawh quarantine zel an duh hial thu te pawh hriat tur a awm a, quarantine zawh hlim pawh lo quarantine leh zel duh hun lai kha chu kan dinhmun tawn chhoh dan ngaihtuah hian a tul kan la ti zel em tih pawh hi ngaihtuah chian a tul ta khawp mai. Chutihrualin mahni inthununna a pawimawh a, hmuh khat deuh te tul lova tlawh hram ang chi te pawh kan tih loh chhoh zel a ngai ta tih a lang. Mitthi vui leh khawhar in kal te pawh hi tuna kan kalpui ang hi hripui hian min kiansan mah se, kan chhunzawm mai te pawh a tul mai thei a, chuvangin he Covid-19 hripui hi fimkhur tak chungin kan dawnsawn thiam hi a tul hle a ni.