Aizawl September 28, 2022: COVID-19 hrileng a ziaawm tak avangin Dr Renu Sharma, Chairman, State Executive Committee, State Disaster Management Authority chuan Disaster Management Act tlawhchhana COVID-19 inkaihhruaina hman mek thiahna thupek chu September 27, 2022 khan a tichhuak a, DM Act hmanga inkhuahkhirhna thupek tihchhuah thin chu a sut. 

Health & Family Welfare Department in COVID-19 hrileng dona atana thurawn a tihchhuah - face mask hman leh kut silfai te erawh hman chhunzawm zel a ni ang.

Sawrkar laipui National Disaster Management Authority chuan India rampumah COVID case a tlakhniam tak zel avang leh sawrkarin hrileng a hmachhawnna kawngah inbuatsaihna tha tawk a neih tak avangin March 22, 2022 khan DM Act hmanga COVID inkaihhruaina tihchhuah zui a tul tawh lo tiin sutna order a lo tichhuak tawh a. 

Ministry of Home Affairs chuan February 25, 2022 hnu lamah inkaihhruaina thupek thar a tichhuak tawh lo a ni. Sawrkar laipui hmalakna dung zuiin, State Disaster Management Authority, Mizoram chuan Mizoram chhunga COVID-19 hrileng dinhmun ngun taka thlira a zir chian hnuah case a lo tlakhniam tak zel avangin DM Act hmanga inkhuahkhirhna thupek tihchhuah thin chu a sut ta a ni.