Nikum kumtir atanga India ram tibuaitu Covid-19 chu tlema ziaawm deuh hnuah tunhnaiah a thawh hnihna che lehin hri vei thar an pung nasa hle a. India ramah pawh hri veithar hmuh tam lam chuan a hma ni a khum ta zel mai. Sawrkar pawh a mangang a, theihtawpin hma la bawk mahse a sawt mawh hle.

Mizoram pawh hripui thawhhnihna hian min tuam ve leh a, a hmaa hrivei hmuh miah loh ni te, ni khata hrivei thar 2/1 chauh hmuh thin ang te kha tunah chuan tam deuh deuh hmuh a ni leh ta. Covid vei tihdam zat percentage pawh a hniam chak leh ta raih raih hle mai.

Tun dinhmunah chuan Mizorama positive tam chhan ber hi state pawn atanga lo lut te vang niin a lang a, hmuhchhuah tam ber pawh Lengpui airport niin a lang. Tualchhunga hmuh te pawh a tlangpuiin phailam nen inzawmna engemaw tak awm a ni duh hle a, chuvangin Mizoram luhna kawngka pawimawh pahnih Lengpui airport leh Vairengte screening point ah te uluk lehzuala hmalak a ngai a ni tih a chiang hle mai. He lai atanga rawn lut te hi hri kai an ni emaw, kai chiah lo pawh an chuan pui te thleng hian uluk taka v il zui an ngai dawn tih a lang reng. Phai lamah he natna hi an palzam viau nia sawi a awm vang ngawt hian kan palsam ve a thiang lo a, a hma ang bawk khan zin veivak te hi chu engemaw chen chu khunghran hi an ngai tih a lang reng mai.

Khawvel buaipui luih luih leh mi sang tam tak thihna thlentu Covid hi Mizoramah chuan kan tuar nep hle mai a, hei hi a chhan ber chu kan thuawihna vang hi a ni. Sawrkar, kohhran, tlawmngai pawl leh mipui kan tanrualna hian rahtha a chhuah thin a ni. Tunah pawh sawrkarin inkaihhruaina thar SOP a duang leh a, heng sawrkarin ruahmanna thar a siam te hi thuawih taka  mipuiin kan zawm phawt a, a hma ang bawka kan tanrual thak kha chuan hrileng hi kan tireh thei anih em loh pawhin a ziaawm ngei ngei ang.