Chief Minister Zoramthanga hova mi pawimawh thukhawm chuan Covid 19 vanga inkharkhip kalpui mek chu chhunzawm tur nge tihtawp tur tih an ngaihtuah a, mi pawimawh kalkhawm te hian tuna lockdown kalpui mek chu a hun a tawp hnuah pawh Mizoramah chuan la chhunzawm zel ni se tiin rawtna an siam a ni.

Lockdown chungchang hian sawi a hlawh a, inhnialna pawh a awm tam reng a ni. Mi tam takin chhunzawm zel an duh laiin mi engemaw zat chuan thlahdul tawh mai an duh thung a. A leh lam leh lam hian tanchhan tha tak an nei ve ve a, an thlirna pawh hi a dik hle ve ve a ni. Chutih karah chuan mithiam ten kan ram tana tha ber tur nia an hriat angin kalpui thin a ni a, an thu kan zawm avang hian vawiin thlengin kan ram chu a la him a ni.

Sawrkar chhinchhiah danin State pawn atanga lo haw tur mi 10,496 an awm a, heng te hi Aizawl district-ah mi 4413, Lunglei district 916, Kolasib district 579, Serchhip district 407, Mamit district 567, Siaha district 1011, Lawngtlai district 877, Champhai district 714, Saitual district 232, Khawzawl district 187 leh Hnahthial district mi 127 an ni. Anni bakah hian India ram pawna awm mi 330 in report awm bawkin, Cruise Line hrang hranga thawk mi 211 an awm bawk. Heng bakah hian Mizoram mi leh sa nilo, state a tangkhang mek hi mi 547 an awm bawk a ni.

State pawn atanga lo haw tur te hi kan ram mi leh sa an nih avangin 'Lo haw suh u' tih ngawt theih a ni lo a, mi tam tak chuan an awmna hmunah harsatna an tawk a. Thenkhat phei chu an inluahna ten chhuak turin an ti hial nia sawi te pawh a awm a ni. Chuvangin an ram neih chhun, Mizoram ah thlamuang taka an lo haw hi an tih tur a ni a, keini pawh lawm taka kan lo dawn a tul bawk.

Chutih rual erawh chuan tuna lo haw mek leh lo haw tur tam tak hi Covid 19 hripui a len tamna state atanga lo haw tur an nih avangin fimkhur a ngai hle mai a. Heng tangkhang lo haw te mai ni lovin kan thenawm maiah hrikai mi engemaw zat an awm bawk a, Health care lamah kan pachhe bawk si. Tuna state dang atanga mi sing chuang lo haw zingah hian hri kai palh hi an awm ngei te pawh a rinawm a, an awm lo hlauh anih chuan kan vannei hle tihna a ni ang. Chuvangin sawrkar hi tun atangin Covid damlo enkawl turin khawl leh thawktute ah nasa taka a inpuahchah lawk a pawimawh hle.