Editorial

Covid 19 lakah fimkhur zual a hun leh ta

Admin - Apr 03, 2021

Covid-19 vanga kan tawrhna te hre rengin a vei lo tura theihtawpa tan kan lak a pawimawh a, fimkhurna hi himna a ni tih hriain tan i la thar leh teh ang u

Tunhnaia Health Minister Dr. R. Lalthangliana hova mi pawimawh thukhawm chuan India rama COVID-19 second wave lo hluar leh mek chungchang thlirin COVID-19 variant thar hi a hmaa hri leng aiin 70% laia inkaichhawn awl a nih avang leh a ziarang dik tak mithiam te pawhin an la hriat kim theih loh avangin Mizoram chhunga chengte pawh a hma aia fimkhur lehzual turin an chah a. Hrileng thawh hnihna hi hmachhawn tura kan theih ang chin-ah kan lo inbuatsaih a ngai tih sawiin he hri laka kan himna atana pawimawh chi hrang hrang mask vuah that, kut silfai uluk leh social distancing bakah sawrkarin inkaihhruaina a siam Standard Operating Procedure (SOP) te a hma aia uluk leh zuala zawm a pawimawh thu an sawi a ni. 

India rama hluar thar leh mek hripui hi Mizoramah chuan a lo la thleng lo nia a lan rualin phai lam atanga lo haw/zin te zingah hri hmuhchhuah a tam chho ta hle mai a. Chuvangin second wave hian min tuam tan ta niin a lang. Hripui len laia a hrehawm zia, inkharkhip ninawm zia te chu a hretu te vek kan ni a. Nitin eizawnna kawng zawh theih a ni lova, chhiatni thatni ah pawh bituk awmin thiltih a ngai thin. Kan nitin nun a tibuai a, chhungkhat leh thenawm khawvengte pawh inlenpawh ngam lovin kan awm anih kha. COVID-19 vanga inkharkhip leh inkhuah-khirh chhunga kan tawrhna leh hrehawmna te hre reng chungin hetiang hun hi a thlen nawn tawh loh nan sawrkarin in inkaihhruaina a siam te hi kan zawm that a ngai hle mai.

Covid-19 hripui hi a hlauhawm em em rualin kan vanneihna chu mithiam ten inkaihhruaina dan an siam te kan zawm chuan he natna lakah hian kan fihlim thei hi a ni. Tun hnaiah hrileng a ziaawm nia hriain inkaihhruaina te kan zawm tha lo sawt hle mai a, hei hi thil pawi tak a ni a, sawrkar thuchhuak hi kan zawm thiam a pawimawh hle. Covid-19 vanga kan tawrhna te hre rengin a vei lo tura theihtawpa tan kan lak a pawimawh a, fimkhurna hi himna a ni tih hriain tan i la thar leh teh ang u.