Khawvelin a buaipui leh mi sang tam takin an thihpui Covid 19 hripui chuan Mizoram pawh min chenchilh chiang ta hle mai a. Aizawl khawpui ah phei chuan vantlangah a darh tawh a tih loh theih loh a, eng angin nge hmundangah a darh zel ang hriat a ni lo a. Engpawh thleng thei anih avang hian Mizoram khaw tin hi kan lo inbuatsaih ran a ngai ta hle mai.

Covid 19 hri vei hi Mizoramah ringawt pawh 1000 kan chuang ta a, mithiam ten an sawi dan phei chuan December 2020 ah phei chuan 5000 kan tling thei dawnin an hria a ni. Covid 19 hi thil thar anih avangin mithiamte pawhin a hnathawh dan te, inkaidarh dan leh a enkawlna chungchang pawh ni tin an zir thar chho reng a. Vawiin a dik nia an hriat hi naktukah chuan a dik lo leh mai thin a, chuvangin a natna chungchangah hian dawt sawi pawh thil awl tak a ni.

Engpawhnise he hri laka kan himna atan chuan mithiamte thusawi hi mipui ten kan zawm tlan hram hram a ngai zel dawn a. Thu kan awih chuan hri lakah kan him thei a, kan him lo anih pawhin hri darh zel tur hi kan khuahkhirh thei a ni tih kan hriat thar leh a pawimawh. Tunah pawh sawrkar chuan AMC area-ah partial lockdown a puang mek a, hei hi kan zavaia himna tur leh hri kaidarh tur venna atana thil pawimawh anih avangin mipui ten thu kan awih hram hram a pawimawh.

Covid 19 hri leng lakah hian kan fihlim reng thei kher lo mai thei a, chuvangin kan rilru pawh lo inbuatsaih a tha. Hun hmasa lama Covid vei te chu thi mai tur anga kan suangtuah thin leh anmahni pawh kan tih em em na thin te kha tunah chuan kan ngaihdan kan thlak tan ta a. Covid 19 chu natna chi khat ani tih leh India ramah ngat phei chuan hri vei tihdam an tam avangin lo chiai viau hi a fuh lem lo. Mizoram phei chu Pathian khawngaihna a zarah hri vanga thi kan la nei lo a, kan neih loh zel pawh i beisei ang.

Tunhnaiah hripui vei hi Aizawl veng hrang hrangah hmuhchhuah a ni a, hei vang hian sawrkarin hri vei te enkawlna hmun tura a ruahman sa te chuan a dawl zo ta lo a. Aizawl khawpui pawnah te enkawl an ngai ta hial mai a, tunah hian result nghak mek leh test tur mi za tel an awm a. Enge kan hmabak ni dawn tih hriatthiam a har a, kawng leh lamah ngaihtuah chuan a darh huk mai ang tih a hlauhawmin result pawh hriat a chakawm loh khawp mai. Engpawhnise lo chiai viau hun a ni lo a, rilru huaisen tak leh fim taka lo hmachhawn hun a ni. Tun ang zela a kal chuan Covid enkawlna hmunhma hian min daih dawn lo tih a chiang a, chuvangin kohhran leh tlawmngai pawl ten kan hmunhma te hri vei enkawlna atan kan ruahman a la ngai ngei dawn a. Chumi atan chuan tun atang hian ngaihtuahna lo seng lawk thei se a duhawm hle.