Hri a len thar leh mek lai hian sorkar laipui chuan Zirtawpni khan state leh union territory tin hnenah lehkha thawnin Covid-19 laka himna tur - hmai tuam, insil fai ngun leh mi dang hlata awmna dante khauh zawka kengkawh leh turin a ti.

Tun hnaia hri kai an pun leh thut chhan hi mipuiin dan zamte an zawm loh leh tak vang a nih thu sorkar laipui chuan a ti a, a bikin punkhawm tamna laiah palzam a nih thu a sawi.

“Thla nga vel lai COVID-19 kai thar an tlakhniam hnuah tun hnaiah ram chhung hmun thenkhatah an pung leh ta a. Hei hi mipuiin vantlangah COVID-19 dan zam an thlahdah leh tak vang a ni,” tiin Union Home Secretary Ajay Bhalla chuan lehkha a thawnah hian a tar lang.

Hri kai an pun leh mek lai hian kutpui lo thleng turah pawh COVID-19 laka himna tura dan zamte chu khauh leh khawng taka kenkawh tur a nih thu home secretary chuan a tar lang.