Covid-19-in kan ramah bu a khuar nghet ta viau mai a. A vei thar te nat danah mithiamte ngaih a tha lo a, bakah thlasik kan hnaih chho tan nen sawrkar pawhin a darh zel lohna turin puanven a sawi chhing thar hle a. Thawhtanni atang hian Covid 19 No Tolerance Fortnight hman a tum a ni.

Tun hnaia Covid-19 damlo tharte nat dan hi thla liam tate nen a in ang tlat lo a. Kar hnih chhung chu sawi loh, tun ni 3/4 chhunga damlo tharte zingah a tam zawk chu symptom nei an ni zel a, thalai zingah pawh a ni hlawm a ni. Natna lan chhuah vanga hmuh chhuah an nih deuh zel avangin an na viau hman a, a then chu ICU a dah luh ngai leh ngaihtuahawm takte pawh an ni ta hlawm a. Tuna thil thlen dan hi a hmaa mi nen a letling ti ila a sual lem lo ang, contact tracing atanga hmuhchhuah te kha chu symptom an neih hmain enkawlna pek hman an ni deuh zel a, hei vang hian kan lak lap phah ni te pawhin a lang .

Zan hnih liam ta khan kan mi thiam rualten electronic media lamah Covid-19 dinhmun tharlam ber an sawi ho a, tum dang aiin kan dinhmun a tha lo niin a lang a, community transmission te pawh a lo thleng reng tawh a lo ni a. Hetih lai hian punkhawmna lamah mipui an insum loa, lungphun, inneih, mitthi ralah te sawrkar thupek zawm a ni mang lo a. Fimkhur loh chuan damdawi in khum pawh indaihlo thei dinhmunah kan ding thei ta reng mai. Kan taksa raldotu (immune system) chu tribal dang leh khawthlang ram aia a chak bikna a awm loh thu leh cancer, zunthlum leh natna benvawn vei tam tak an awm tawh avangin kan dinhmun a that loh theih thu te a ruh langin mi thiamten an sawi khawl khawl a nih kha. Inven dan kan hre vek tawh a, chumi chu thuawih taka zawm mai hi kan tihtur awmchhun niin a lang a, mawlmang taka ngaihdan lo neih neih hi a fin-thlak ber lo thei tih a lang tan mek a ni.

Covid 19 No Tolerance Fortnight atan hian sawrkar chuan inkaihhruaina khauh tak a siam nghe nghe a. Mihring chhuakvak an tam apiangin he hri hi a darh zel a, lockdown ang buaih buaih kha puan a rem chiah tawh lo nen, he ruahmanna hi loh theih lohin central-in a siam zulzui ang deuhin siam a ngai ta hial a ni. Covid no tolerance in tum ber hripui inkaidarh khaidiat chhut chah hi a hlawhtlin theih ngei na turin mipuite’n mawh an phur tih hriaiin thuawih zir ila. A kengkawhtu lam pawhin thlei bik neilovin hma la bawk sela a tha ang.

Hunliam taah pawh fimkhur a ngaih thu ri reng mah se, mipui lamin hripui len chhung chu nunphung thlak danglam an tum thei lo hi ze mak tak mai a ni a, hei hi a thlen hma chuan hripui hian min nuai na tial tial dawn tih a lang ta. Sawrkar a ngawih deuh chuan mipui lam an inthlahdah zel bawk si a. Kar hnih chauh ti lo hian dan tha tak tlawh chhan tur a awm tawh a, thuneitute hi khauh mar at reng mai sela rah tha zawk a chhuah a rinawm.