World Health Organization (WHO) chuan tun laia Europe khawmualpuia Covid-19 thawh thar thawk leh mek chu buaipui a ngai tak zet tih a sawi.

BBC hnenah WHO regional director Dr Hans Kluge chuan hma lak thuai a nih loh chuan mi March thlaah chuan mi 5,00,000 an thih hman tur thu a sawi.

Dr Kluge-a chuan inkhuahkhirhna, hmai tuam ringawt pawhin nasa takin a darh tur a veng thei dawn tih a sawi.
WHO-in a hlauhthawn thu hi ram hrang hrangah hri kai hmuh tam ber ni tawnga inkharkhip leh a nem deuh zawka inkharkhip an kalpui thar leh mek laia a sawi a ni.

Dr Kluge chuan thlasik lo thleng, invenna la tam tawk lo leh inkai awlsam tak, Delta variant-in khawmualpui a tuam chu heti taka a darh leh chhan a nih theih thu a sawi a. Vaccine chak zawka pek, damdawi in inbuatsaih leh enkawlna thar zawk hmanga \an lak chuan tun dinhmun hi tlemin a tiziaawm thei dawn niin a sawi.

“Covid-19 hi kan khawmualpuiah hian miin an thihpui tam ber  a ni leh thuai dawn,” a ti a. Hri leng laka himna tur leh do tur hian mi tinin tih ngai an hre vek tih a sawi bawk.

Dr Kluge-a chuan invenna lak chu ‘ngei ngei tur’ tih chu an himna awm chhun a nih thu a sawi a. Chutih rual chuan a hun thu leh vantlangah inhnialna a nasa hle mek si niin a sawi.

“A hmaa hma lakna dang, Covid pass pawh kan ti a; mahse, kha pawh khan zalenna tihchepna, mi mal zalenna danna a ni tho,” a ti.

Austria chu Europe ram zinga Covid-19 vaccine lak chu dan anga kalpui hmasa ber niin Zirtawpni khan an puang a. February atangin an hmang tan ang.

Ram pumah hri kai tam ber ni an tawn thar leh avang leh invenna la an la tlem em em bawk si avangin inkharkhip an puang thar bawk.

European ram dang eng emaw zat pawhin hri kai an pun avangin inkhuahkhirhna an kalpui thar mek hlawm.

Czech Republic leh Slovakia chuan invenna la la ve lote tan khuahkhirhna an puang tawh a. An ramah invenna la lo zingah kai an pung chak hle a ni.

Netherlands-ah pawh Covid-19 inkai darh loh nan inkhuahkhirhna kalpui a ni a; mahse, Rotterdam khawpuiah chuan Zirtawpni zan zankhua khan a duh lotu leh venhim hna thawktute an intibuai a. Mi za tel pung khawmin inkhuahkhirhna tihkhauh an duh lo va, kum thar lawm nana halmawi hal khap an duh lo hle bawk.

German Health Minister Jens Spahn chuan an dinhmun chu ‘national emergency’ a nih thu a sawi a, hetih rual hian ram pum inkharkhip erawh kalpui a ni dawn lo tih a sawi.

UK-ah Zirtawpni khan hri kai hmuh chhuah mi 44,242 an awm leh a. Sorkar chuan inkharkhip kalpui leh tumna a awm lo tih a sawi a, hetih rual hian NHS-te hum nan inkhuahkhirhna thar hman tum a ni a. Hei hi Plan B tiin in chhunga thiltihnaa tel tur tan Covid passport neih te, in chhunga pun khawmnaah hmai tuam vek te, in atanga hna thawh te pawh a tel dawn.