Aizawl March 24, 2023 : Dr. R. Lalthangliana, MNF Adviser chuan vawiin khan Lunglei Municipal Council inthlan turah ward hrang hrang a fang a, Lunglei MIZOFED kawt, Venglai-a MNYF Sub-Headquarters Lunglei huaihawta thu a sawinaah Covid awm lo anga social media beih an tawk thin chu mak a tih thu a sawi. 

Health Minister chuan MNF sawrkar term hmasa a MNF-in UD&PA department dan leh chu chuan municipal a kalpui nghal tih sawiin,  "Chumi kal zelah kum 2010-ah AMC inthlangin Congress leh a thawpuite an sawrkar a, Congress sawrkar kha a sual vang ni kher lovin, a ngaihna hriat loh vang leh a dintu an nih loh avangin municipal kalpui dan an hre lo a, musical chair ang maiin an kalpui a. Thuneihna atchilh luat avangin AMC kha a kal tluang thei lo.  A hnu Congress sawrkar vanglai takin kum 2015-ah AMC kan inthlang leh a, a malin MNF kan sawrkar ta a ni. Tunah MNF kut chhuak leh bultan LMC hi a kalpui dan tur dik hre sa thlap an ni," tiin MNF official candidate-te Lunglei khawpui hmasawn nan vote tling turin a sawm.

Dr. R. Lalthangliana chuan Covid lai khan MNF ni lo, party dang sorkar ta se, kan ram dinhmun hi a ngaihtuahawm khawpa a rin thu a sawiin, "Mihring pulh hri mai ni lo, vawk pulh hri a leng a, ramri a buai a. Tu sawrkar lai maha an tawrh ve ngai loh khaw chhak lam unau duh takte politics buai avangin lo khual chhawn a ngai a. Hriat lawk miah lohah cheng vaibelchhe tam tak sen ral a ni a. Kei pawh hi Covid lai khan Health Minister ka nih angin engmah ka la thawk hman lo a, damdawiin tha kan sa hman lo a, damdawi tha kan lei hman hek lo. Tunah kan thawk ve dawn chauh a. Mahse, Mizoram chu task force, sawrkar hnathawk, kohhran, sawrkar leh mimal tin kan tangrual a. Pathianin he sawrkar hi mal a sawm a ni. Hun harsa kan tawrh chhung khan kan worker leh mipui tan duh angin engmah kan la thawk thei lo. Kan duhthusam tam tak hi Lalpa'n zahngaihna a lantir ang a, sorkar tharah hripuite awm tawh lovin mipui tan theihtawp kan chhuah thei tawh ang," a ti. MNF ministry-in a tawrhna zozaite hre duh tawh lova, covid awm lo ang maia social media-ah thu phuahchawp nen sawrkar an bei chiam chiam thin chu mak a tih thu a sawi bawk.