Covid avanga mi tute pawh mai inhnaih theih reng reng loh a nih lai khan khelmual khar niin a hmunah tumahin an en thei lo va, tunah erawh khawvel a dam tawh a, football inpui, Europe-ah pawh entu an pung leh ta thur thur tih Uefa chuan a sawi.

‘European Club Talent & Competition Landscape’ tia zir chiannaa an hmuh a tihchhuahah Uefa hian an hnuaia ram 48-a league sang ber chu 2022-23 chhung khan a hmuna entu mi maktaduai zet an pung khawm tih tar lan a ni a. League hniam zawk leh cup inchuhna zawng zawngte nen phei chuan maktaduai 209 zet an tling.

Premier League chu season liam taah khan a hmuna entu ngah ber niin mi maktaduai 15.3-in an en a, club tlem zawk avanga inkhel nei tlem zawk, Bundesliga chu chawhruala inkhel entu ngah ber an ni thung.

Scottish Premiership chu Europe ram zinga entu ngah pariatna niin mi maktaduai 3.8-in an en.

English football league chu entu tam ber niin league hniam zawk zawng zawng nena chhut chuan mi maktaduai 22.5 laiin enin Germany chu hemi zahve vel niin an dawt a ni.

Spain leh Italy chu pathumna leh palina niin entu maktaduai riat an nei tling lo ve ve.

Club malah Spanish La Liga champion Barcelona chu a hmuna tantu ngah ber niin season liam ta chhungin an muala league-a an inkhel chu mi maktaduai 1.59 zetin an en a. Manchester United-in dawtin Old Trafford-ah entu maktaduai 1.4 an pungkhawm ve thung.