Aizawl March 8, 2023:  Vawiin khan Chief Minister Zoramthanga chuan 1st Bn. MAP Football Ground, Armed Veng-a Synthetic Football Turf & RCC Gallery a hawng a. CM chuan, "Covid hripui kara hnathawh rah lo lang a ni. Khelmual (gallery) hnuaia in pui awm ngat hi Mizorama awmchhun a ni ang," a ti. Khual thlengtu Sports Minister chuan phullem chu mamawhna avanga phah a nih thu a sawi.

Khuallian Zoramthanga chuan, "Covid buaina karah sawrkarin theihtawp a chhuahna rah chu tunah a lo thleng ta. Indopui vanga Japan ramin chhiatna an tawk leh atom bomb-in an khawpui a tichhe vek chungin an thawhrimna avangin an ding chhuak leh a, tunah chuan khawvelin chhiat an tawk tih a hre tawh mang lo," a ti.

CM chuan, "Covid vanga harsatna karah Pathianin malsawmna ropui, tunhmaa kan neih ngai loh kan han neite hi - bawng vun khawra aurinna siamchawp nen kan inkhelh thin laite ngaihtuah chuan khelmual sira tawm hulna tur tha tak a awm ta te hi hmasawnna nasa tak a ni," a ti bawk.

He hunah hian khualzahawm Home Minister Lalchamliana pawhin thu a sawi a. Mizoram state pachhiatzia leh sports department budget chu a te ber a ni chunga Sports Minister Robert Romawia Royte-a'n theihtawp chhuaha hmalakna ropui tak a kalpui chu fakawm tiin, khelmual hmangtu turte duhsakna a hlan bawk a ni.

Phullem lem hawnna program huaihawttu leh khualthlengtu Sports Minister Robert Romawia Royte pawhin Police leh Armed veng ten field tha tak an neih chhan chu Pathian zarah Chief Minister leh Home Minister vang a ni, a ti a, Sports Council leh Police-te inremsiamnaa tihpuitlin a nih thu a sawi. "A scheme - Khelo India angin vantlang hman tur (public utility) a ni a, Armed Veng tan phei chuan a thlawna hman theih tur a ni," tiin,"He khelmual gallery hnuaiah hian In chhawng thum - Mizorama in lian ber, Mizorama in sei ber sak mek a ni," a ti bawk.

Phullem lem a tam, tih an sawi thin a, a tak takah chuan mamawhna (demand driven basis) avanga siam a ni zawk tiin, Robert-a chuan, "Area hrang hrangah an duh ber chu phullem a ni. MLA-te pawhin a fala min hmuh chuan, phullem min dil vek. Tun sawrkarah hian Mizoram sawrkar hmalaknain phullem 30 siam hman kan tum a ni," a ti bawk.