July 22, 2022; Champhai District Lirthei Inzawmkhawm Pawl (CPDLIP) ten June ni 13, 2022 zing dar 6 atanga Myanmar atanga dan loa Mizorama bungraw lut tur leh Champhai atanga chhuak turte tiamchin awm loa an dan chu July ni 25, 2022, Thawhtanni zing dar 6 atangin an titawp dawn.

CPDLIP chuan Mizo mipuite, thuneitute thawhpuina leh sawrkar thuthlukna ngaihchan mek a nih avangin an hmalak mekna chu an titawp lailawk rih dawn tih an puang a, bungrua an dan chungchang ah Champhai district mipuite leh Mizo mipuite thlawpna ah lawmthu an sawi a, Champhai district a sumdawng pawl hrang hrang te, lirthei association hrang hrangte thlawpna leh hmalakna ah lawmthu an sawi.

Thuchhuah an siamah CPDLIP chuan, Mizo mipuiten Indo Myanmar border trade sumdawnna items tam tak zing ah, item pakhat chauh malmanin, tihtawp hial tum a hmalakna awm mek tih an tarlang a, "Tun dinhmun ah chuan dan ang a sumdawng bungrua a kal theih loh dan leh kuhva chauh chu dan loa Mizoram a lut bik a nih lohzia Mizo mipui ten kan hriat phah a, lawmawm kan ti hle a ni," an ti.

Champhai district hamthatna chu district dang a dan kengkawhtu nilo ten harsatna lo siam tawh lo se an duh tih tarlang bawkin, "Hetiang a mimal emaw pawlho in a hmala a harsatna an lo siam leh a nih chuan tun aia khauh leh zual a hmalak a ni ang," an ti bawk.