ZALEN, March 11, 2025: Cricket Association of Mizoram (CAM) chuan khelmual an neih sa baka a dang siam hna an thawh mek chu an bawhzui zel a. Thawhlehni khan sorkar hotute nen thil tulte ena sawihovin an hruaitu lawkten an tlawh.

Tanhril, Aizawla CAM khelmual tur nawr zawl hna thawh mek hi Mizoram sorkara PWD hotu - Er. K. Lalbiakthanga, Project Director, PIU; Er. H. Lalthanpuia, EE, PWD leh Er. Jacob Lalremsiama, JE ten an en.

CAM atangin President Lalrochuanga Pachuau leh Vice President Dr. Joel Lalnghakliana ten dawngsawngin khelmual siamin kawngin a sut dan tur an en hovin hma lak dan tur an thlir.

Tanhrila CAM khelmual siamna hmun hi an preseident-te chhungkuain an pek a ni a, July, 2023 atang khan sam faiin excavator hmangin nawr zawl hna an thawk tan a ni.

Khelmual siam hna an tan tirh hian CAM hruaitute chuan inkhelh theihna tur bik chuan kum thum kum li chhunga peih hman an tum thu an sawi.

CAM hian Sihhmuia miin ram an peka an sak, a petute hming chawia Suaka Cricket Ground an nei mek a, he khelmual an buaipui lai hian Board of Control for Cricket in India (BCCI)-ah an la inziak lut (affiliate) lo va, anmahni puala sain kum 10 hnu velah an sa zo thei.

Tuna mi erawh BCCI atanga sum awm sa a nih dawn avangin rang zawka peih theih an inbeisei a ni.

Mizoram cricket hruaitute hian Sihhmui khelmual chauhchu an indaih lo tih an lo sawi tawh thin a, a dang neih tum hian an bei nasa hle thin.

BCCI-in kalphung a neihah state association-te hi khelmual sakna tur sum a tumsak thin a, a hmun erawh a ngaihtuahsak ngai lo va; association emaw, state sorkarin emaw a lei a thin a. Hei vang hian CAM pawhin khelmual siamna tur hmun a ngaihtuah nasa hle thin a, an president-te chhungkuain an pe ta a ni.

Tanhrila khelmual siam mek hian Sihhmuia mi tiat phak dawn lo deuh niin a lang a; mahse, cricket khelmual pangngai tiat (cricket khelmual zawng zawng hi a intiat thlap thlap lo) leng tur tho a ni.

CAM hian cricket khelhna tur hmun hi Aizawla khelmual awm sate pawh siam rema hman theih tura cheibawl tur a dap reng a. Hmun hnih hmun thum thlithlai pawh an nei a; mahse, chianga sawi theih erawh a la awm lo.

District dangah pawh khelmual tur hmun a dap reng niin a sawi bawk.