ZALEN Jan. 8, 2026: Venghnuai Raiders Cricket Club (VRCC) batsman K. Lalremruata chu vawiin (8.1.2026) a an inkhelh laiin a awm dan a dik lo thut a, chatuan ram a pan zui.

Cricket Association of Mizoram (CAM) buatsaih Khaled Memorial 2nd Division Screening Tournament khelh mek niin, vawiinah VRCC leh Chawnpui ILMOV CC te chu Suaka Cricket Ground, Sihhmuiah an inkhel a. K. Lalremruata hian VRCC tan run 40 a vaw chhuak a, a out avanga a chhuak chu a awm a nawm loh thu a sawi a. A awm velah hnawhtu a awm thu sawiin an buaipui zui a. Rang takin Sairang damdawi in panpui ni mah se an chhan thei ta lo a ni.

He thil duhawm lo tak mai a thlen hnuah hian a bat pui chuan, "Ni danga ka khelhpui thin ang kha a ni lo, amahah khan eng emaw danglam riau a awm," tiin a sawi.

K. Lalremruata hi batsman tha tak niin, Mizoram aiawh pawhin a lo feh chhuak nual tawh a. Cricket a khelh mai bakah hian match referee leh umpire te pawh a ni thin a, CAM tan pawh mi tangkai em em a ni.

VRCC player ni mah se K. Lalremruata hi Maubawk Venga cheng a ni a. A ruang hi zaninah lumen a ni ang a, naktuka vui tur a ni.