ICC Cricket World Cup final chu vawiin Pathianni chawhnu hian India leh Australia ten an khel dawn a, British singer Dua Lipa a zai dawn niin media hrang hrang ten an tarlang nasa hle. 

Final hi chawhnu dar 2:00pm atangin Narendra Modi Stadium, Ahmedabad-ah khelh a ni dawn a, Dua Lipa perform dawn leh dawn loh hi an ngaichang thup a ni. A inlan dawn leh dawn loh a chiang mai lo hi a mak hran lo a, football khawmpui lian ber FIFA World Cup-ah meuh pawh final-a zai tur hi puan lawk a ni ngai meuh lo. 

ICC World Cup 2023 final-ah pawh hian British pop icon Dua Lipa hi a inlan ngei a rinawm a, a inlan lo palh a nih pawhin media ten an lo vawrh darh hi an dem awm lo - ICC World Cup 2023 kaihhnawihah hian TV lamah a lo inlan zuk tawh a ni. 

Kum 28 mi Dua Lipa hian kum 2019 khan a vawi khat nan India lei lung a lo rap tawh a, a rawn rap nawn leh a nih ngat chuan lawm a hlawh leh viau ang le. ICC Cricket World Cup 2023 final en tur an sawi lan zingah hian - Prime Minister Narendra Modi pawh a tel a, England footballer chhuanvawr David Beckham erawh an khaw lamah a let leh tawh a ni.