Khawvel cricketer ropui ber zinga chhiar hmaih tawh loh tur Australia leg-spinner Shane Warne chu kum 52 mi niin lungphu chawlin a thi. Kum 15 chhung zet cricket a khelh chhungin Warne hian Test match bikah wicket 708 zet a la a, khawvel-a wicket la tam ber pahnihna niin a ram tan match 145 a khel hman a ni. 
   

Zirtawpni khan a chenna villa, Thai island, Koh Samui hmunah thi a hmuh a nih thu a management company chuan an puangin "Shane Keith Warne a thih thu lungchhiat thlak tak puan a ngai hi pawi kan ti tak zet a, lungphu chawl vanga thi niin kan hria. Medical staff ten theih tawp an chhuah chung pawhin an chhan zo ta lo a ni," tiin an sawi. 
   

Australia Prime Minister Scott Morrison chuan Warne-a chhung te hnenah state funeral hmanga vui a nih tur thu a hrilh tawh a ni. Warne hian a  nupui hlui  Simone Callahan-i lakah fa pathum a nei a ni.  
   

Warne hian kum 1999 khan a ram Australia chu 50-over World Cup-ah a champion pui a, kum 1993 atanga 2005 chhung khan one-day international match 194 khelin wicket 293 a vawt out thei a ni. Kum 2000 khan kum 100 chhunga player ropui 5 thlan chhuah zingah telin Sir Donald Bradman, Sir Garfield Sobers, Sir Jack Hobbs leh Sir Viv Richards te ho nen a hming ziah tlar a ni. 
   

Kum 2007 khan international cricket chawlsan a ni. Kum khat hnuah Warne hian first-class leh List A cricket chu a chawlhsan leh bawk. Hampshire tan kum 7 chhung zet khelin kum 2004 khan captain a ni tan bawk. Twenty20 lamah hian hun hmang rei deuhin kum 2013 thleng kha a khel bawk a ni. Waren-a  a thi tih an hriat hma darkar reilo teah Australia wicketkeeper Rod Marsh kum 74 mi chu lungphu chawl thoin a lo boral tawh bawk.
   

Kum 2000 atanga 2007 chhung khan Warne hi Hampshire tan season li chhung captain a ni thin a, Warne-a kaihruaina hnuaiah Hampshire hian 2005 khan one-day Cheltenham & Gloucester Trophy an chawi a ni. Warne hian Australia's Big Bash League-ah Melbourne Stars tan leh Indian Premier League-ah Rajasthan Royals tan a khel thin bawk.