Footballer ropui pahnih Lionel Messi leh Cristiano Ronaldo te hi kum 15 chhung zet chu mual chhungah ropui zawk nih tumin an lo in el tawn tawh thin a. An thiam em vangin an pahnih hian duhtu an ngah bakah khawvel footballer te chawimawina sang bera ngaih Ballon d’Or pawh tum 12 zet an in thei sem tawh a ni. 
   

An pahnih ropuina hian chhuan tam tak a daih tawh dawn a, football chanchinah theihnghilh an ni tawh ngai lovang. Thangkhat lian zet chhung chu an team innghahna an ni thei ve ve a, tunah hian kum 30 ral an kai hnu thleng pawhin player dangte chungah an la leng thei tlat a ni. 
   

Messi leh Ronaldo hian season 15 chhungin goal thahnem tak an thun a, hemi chhung hian Messi hian season riat zet chu Ronaldo aiin goal a thun tam zawk a, Portuguese forward hian Messi-a aiin season 6 chhung a thun tam zawk bawk. Kum 2010-11 season khan an pahnih hian goal 53 ve ve thunin thun tam zawk an awm lo. 

Goal khung kawnga Cristiano Ronaldo aia Lionel Messi ropui zawkna season hnih i han thlir dawn teh ang. 

2009-10 season
Lionel Messi leh Cristiano Ronaldo te pahnih hian kum 2000 tawp lam atang khan goal thun an ching chho tan a, Hemi kum hi Real Madrid lama Ronaldo luh tan kum a ni nghe nghe a, he season hian competition hrang hrangah goal 33 a thun a, Messi-a erawhin hemi kum hian goal 47 zet thunin goal thun kawngah chuan a chungnung zawk chiang hle. 
   

2009-'10 season khan Messi hi UEFA Champions League leh La Liga-ah goal thun tam ber a ni chiang hle bawk a, “La Pulga” hian European Golden Shoe a dawng a ni mai lo va, Ballon d’Or pawh a dawng tel bawk. Barcelona talisman hlui hian hemi kum hian a team te chu La Liga title a chawipui bawk.

2018-19 season
Lionel Messi leh Cristiano Ronaldo te hian a kum telin goal an thun tam telh telh emaw tih mai turin goal an khung tam thei hle a, kum tin hian goal 40 chuang chu an thun deuh ziah a ni. 
   

Hemi season hian Messi hian goal 51 zet a thun a, Ronaldo aiin goal 23 zetin a thun tam zawk. A hnu deuhah Ronaldo chu Juventus lamah a lut a, hemi kum hian an pahnih hian an league khelhna title an chawi ve ve bawk.
   

He season hian Messi hi UEFA Champions League leh La Liga-ah goal a thun tam ber a, European Golden Shoe bakah Ballon d’Or a hum haw leh bawk.