ZALEN September 19, 2025: All Mizoram CSS Employees Co-ordination Committee (AMCECC) chu tukin zing khan Home & DP&AR Department changtu K Sapdanga nen inkawmna an nei a, sawrkar laka an lungawilohna an lantor chungchang an thil ngiat te an sawiho ho a, hemi chungchangah hian vawiin khan sawihona an nei.

All Mizoram CSS Employees Co-ordination Committee (AMCECC) chuan thuchhuah an siamah, "Kan Minister zahawm tak hian Government of Mizoram Regularisation of CSS Employee Scheme, 2024 chungchang leh OM Checklist te thla khat chhunga min siamthatsak a intiam a, kan duh dante AMCECC hruaitute nen sawiho zel a remti bawk a. Min ngenna zahawm kan tiin Sawrkar hmalakna hi ngaihchan nise. Chutihrualin, Sawrkarin Show Cause Notice a chhuah tawh hi cancel nghal vek tur leh, CSS Employees te laka hremna lek a tum mek hi sut nghal turin kan phut nghal bawk a ni," an ti.

AMCECC chuan, "Tun dinhmunah chuan Sawrkara lungawilohna kan lantir mek hi Sawrkar hmalakna ngaichang zel chungin leh CSS Employees thlawptu mipui tam tak ten harsatna hrang hrang an tawrh nasat em avangin he nawrhna hi chawlh lailawk phawt ni se kan ti. Chuvangin, vawiin ni 19.9.2025, tlai dar 4:30 PM atangin AMCECC Gen Hqrs Extended Meeting chuan nawrh a titawp rih a. Kan duh anga Sawrkarin hma a la lo anih chuan kan kalzel dan tur kan rel leh ang," an ti bawk.