Aizawl: Rajya Sabha MP K.Vanlalvena chuan, “Kan culture hi kan vawn nun a ngai a, culture vawn nun nachang hre lo hnam an ral thin a ni,” a ti.

Mizo Department, Mizoram University leh ACE Rentals and Events ten India Independence kum 75 lawmna ni thum awh Programme Evolution Fest a buatsaih kharna Zirtawpni zana Mizoram University Multipurpose Hall a neih a hmanpuinaah he thu hi sawiin K. Vanlalvena chuan, “Kan culture hi Mizo min nihtirtu a nih avangin Mizoten kan vawn nun zel a ngai a. University zirlaiten kan culture an buaipui hi kan tih tur dik tak a ni a. Lehkha thiam rualin kan buaipui phawt chuan mi dang pawhin an zui mai dawn a ni,” a ti bawk.

Khualzahawm Prof. KRS Sambasiva Rao pawhin Mizo Department, Mizoram University-ten ‘Azadi Ka Amrit Mahotsav’ hnuaia ni thum chhung awh Evolution Fest an hmang chu a lawmpui thu te, Mizo Department chu Mizoram University hnuaia Department lian ber zinga mi leh hlun ber pawl a nih thu te, mithiam tam tak chhe chhuaktu a nih thu te, Mizo tawng google translation-a tihchangtlun zel te, Mizoram University pawhin culture a ngaih pawimawh avangin university chhungah pawh cultural centre hmun tur pawh ruahman lawk tawh thu a sawi bawk. 

Evening Culture programme hi zirlai, Mizoram University a thawkte, mi pawimawh sawm bikte bakah H. Wilson, OSD, Union Minister of Parliamentary Affairs leh Nula Jubilee Lalrammawii Parliament Security Service te pawhin an chhim bawk a ni.