October 29, 2023; Nizan (28.10.23) zan dar 11:30 vel khan Tuikual South ah current in mi 3 a man a, an zing a pakhat a boral.

ZALEN thudawn danin, nizan dar 11:30 bawr khan Tuikual South a C.Tawna, Section 1 inluah pakhat (hmeichhia) chu mipa pakhat a thianpa in scooty in a thlah a, C.Tawna in bul nepnawi dawr luhka a kawng hek lai ah hian an tlathla a, an tlak dan tak hi hmu tu an awm loh avangin thu chiang hriat a har a, current man vanga tla nge an tlak hnu ah current in a man hriat a ni lo. An tlakna ah hian mimalin current an pawhluhna hrui, rangva nen a lo in sik avanga current kalin a man zui a ni.

Miipa dang pakhat C. Tawna inhnuai a leng haw mek, anmahni chhan tum tu chu a man bet ve leh bawk a. An authawm atangin thenawm leh veivak ten buaipui tum in pungkhawm mahse, an awmna hmun hi a rem loh avang leh current kal hi a nasat avangin in chhan theih mai a ni lova. P&E department lamin line an off hnuah a rang thei ang berin damdawiin pan pui an ni a. Mi 2 te chhan tum tu FC. Vaveitlochai (33) s/o FC. Tlakho, Chakhei, Tuipang, current in a man hnuhnung ber hian a nunna a chan a ni.

A ruang hi postmortem a nih hnuah an khua panpui a ni ang. Midang pahnih te hi chu tun dinhmunah ngaihtuahawm an ni tawh lo.

P&E department chuan nizan khan a hmun hma an enfel nghal a, current leak dan pawh hriat chhuah niin, siamthat nghal a ni