October 14, 2022; Vawiin chawhma dar 10:30 bawr vel khan Lawngtlai district chhung, Rulkual khua-ah current line chhia siam a Young Lai Association (YLA), hnatlang a thawkchhuak zing a mi 3 chu current man vangin an thi a, midang 2 in hliam an tuar bawk.

Rulkual atanga thudawn danin, October ni 12, 2022 khan Rulkual atanga km 4 vel a hla-ah thing tluin power line a vaw chat a. Line chhiatna hi ramhnuai, tlema khawih harsa lai deuh te a nih vangin department lamin khawtlang lam punin, vawiin khan Power department kaihhruaina hnuaiah hnatlangin power line chhia hi siam a ni.

Hetia line chhia an siam mek lai hian vanduaithlak takin current a rawn kal thut a, chu chuan line siam a lo thawk mek te chu manin, a hmunah mi pathum, Samuel Lalthianghlima s/o C. Lalthawmmawia, Lalramdinpuia s/o C. Lalhmunmawia leh Lalrinchhana s/o Singthuama te an boral nghal a. Midang pahnih Lalrinenga leh Lalnghawrliana chu Lawngtlai lam panpui an ni. Vanduaina tawk a boral te hi kum 21-25 inkar mi vek nia thudawn a ni.

Rulkual YLA president sawi danin, Rulkual line hi Bungtlang South line nen kalkawp a ni a. Bungtlang  South line hi chu a tha a, hetia an khaw line an siam lai hian Rulkual line lamah chuan power a awm lo a,  Bungtlang South line lamah hian power rawn kalin khawi emaw laiah heng line pahnih te hi an lo in tawk a nih an rin thu a sawi.

Laldawngliana EE Power & Electricity Department Lawngtlai Division chuan chhiatna thlenna hmun hi a pan nghal a, khaw thenawm bakah Lawngtlai atangin mi engemawzat in vanduaina thlenna hmun hi an pan bawk.

Vawiin chawhnu lam khan vanduaina tawk a boral mi 3 te hi Rulkual hall thlenpui an ni a, zaninah lumen an ni ang a, naktuk ah vui an ni ang.