Aizawl April 18, 2023 :  Cyber crime lama mi sualten an bumna zinga 70% chu sum leh pai kaihhnawih a ni a. Mi sualten bumna chi hrang hrang an hman mek laka fimkhur turin Mizoram Police chuan mipuite an ngen nawn leh.

ZALEN-in Cyber Crime Police hnen atanga thu a dawn danin mi sualte hian inbumna hi an la kalpui reng a, fimkhur tura police-in thuchhuah an siam chungin bum theih an la nei reng a, complaint lut a awm reng niin an sawi.

Police chuan tun hnaiah internet kaltlanga inbumna a hluar hle a, heng inbumna hrang hrang zingah hian sipai officer anga inchhala an thlalak, ID leh a dangte daha mi bum ching an tam hle niin a sawi a. Heng mite hian bungraw hrang hrang - motor, bike, inchhung bungruate zuarin, a man an dawn hnuah an bungraw zawrhte a leitu hnen thlen lovin an bibo thin a ni.

Heng mi bum chingte hian sipaiho tana ei tur (sangha, sa chi hrang hrang, cake leh theite) order derin a zuartute an bum thin bawk, an order man pekna turin a zuartute hnenah QR Code scan-tirin a zuartute pawisa an lakchhuahsak thin. 

Hetiang hian mi tam tak an bum mek thu police thuchhuah chuan a tar lang a. “Hriat tur pawimawh tak chu kan account-a pawisa lo lut turin 6 digit UPI PIN GPay, BHIM-ah pek a ngai lo va, heng PIN pek ngai titu chuan bum a tum che tih hriat tur a ni,” tiin police chuan mipuite fimkhur turin an chah.

Hei bakah hian company lem siam chawpin mi tam tak chu bum an ni a. Chubakah online hmanga be tlangnel hmasain a hnuah thil thawn tur anga insawiin an pawisate an laksak thin a. Bank-a thawk anga insawiin loan buaipuina (processing fee, convenience fee etc.) a ngai tia sawiin sum an laksak thin bawk a. Mi sual thenkhat chuan video call hmangin an saruak leh taksa dang langten an awmtir a, heng mite blackmail lehin pawisa an pek loh chuan an video-te mipui hmaa pho chhuaha vaute pawh a tam hle niin an sawi. 

Cyber crime-a thawkte chuan hetiang mi sual bumna avanga sum tam tak chân mi eng emaw zat an awm tawh bakah che buai tak tak pawh an awm mek nia sawiin mipuite chu fimkhur turin an chah a. Hmelhriat lohte video call hmang be lo tur te, an biak pawhin fimkhur turin an ngen a. Bank thawk anga insawia an ATM pin etc. diltute chu mi sual an ni tih hre tur leh online hmanga pawisa hmuhna tawktarh laka fimkhur turin mipui an ngen tih ZALEN an hrilh.