ZALEN, June 10: Chief Minister hlui, Zoramthanga fapa, Ramthansiama’n Mizoram House, Ballygunge, Kolkata hralh a nih chungchanga criminal complaint a thehluh chu cyber police chuan chhui zo tawhin David Sailo nia puh, R.Lalchhuanmawia (43), Zemabawk Galilee Veng leh Zosangzuala, Phullente-ah chhui luh niin ZALEN chuan thu a dawng.

Cyper Crime Police hian Final investigation report hi vawiin khan court-ah thehlutin heta a lan dan chuan Facebook-a David Sailo inti hian ‘Kolkata Ballygunge leh Thunawi dang’ tih caption (thupui) hmangin January 11, 2024 khan Facebook-ah a ziak a, Cyber Crime Police station chuan David Sailo hi R.Lalchhuanmawia, Zemabawk Galilee Veng nia an hriat avangin court hnenah vawiin khan an report an thehlut ta a ni. 

Mizoram House, Ballygunge, Kolkata hralh a nih chungchangah chief minister hlui fapa chu a hlawkna tel/leitu tak tak niin social media-ah puh a ni a. Ramthansiama hian court-ah criminal complaint (No 10 of 24) thehlutin cyber police chuan an chhui zui ta a ni.

Hei bakah hian Cyber police chhuina atanga a lan dan chuan Zosangzuala (a.k.a Sena Zote), Phullen chuan ‘Phullen Politics’ Whatsapp group-ah Ramthansiama chu Mizoram House Ballygunge leitu tak tak niin post a lo siam tawh nia thudawn a ni bawk a. Hemi chhuina a atanga a lan dan chuan ama phone atanga chhuak ngei niin an chhui chhuak bawk.

Hetih lai hian Zosangzuala hian BP sang leh zunthlum a neih avanga zin chhuak thei a nih loh thu cyber police hnenah a sawi a, man a la ni rih lo a, a hriselna dinhmun an ngaichang mek.  

David Sailo nia puh, R.Lalchhuanmawia erawh hi chu thubuai dangah man tawh a nih mek avangin Central Jail-ah a la tang thung.