May 15, 2023; Cyclone Mocha-in Mizoram chhungah chhiatna thlen bawk mah se, lian tham lutuk a chhiatna thleng a awm lo nia hriat a ni.

Cyclone Mocha hian inrinni zan dar 1 vel atang khan Lawngtlai District a nuai na viau a, vanneihthlak takin hriat theih chinah thi leh hliam an awm lo.

Hriat theih chin ah AOC Veng Lawngtlai chuan thli hi an tuar na zual a, AOC Veng Field Pavillion chung a la a, YLA Hall chung a lak bakah Middle School leh LIKBK Biak In pawh a tichhe nual. Mimal in thenkhat bakah, Lawngtlai DC Office Complex a NIC atana hman chu a chung thenkhat thli hian a la bawk.

Lunglei khawpui-ah chuan Inrinni tlai atang khan nimin thlengin khua a chhia a, inkhawm pawh nidang aiin an tlem a, nimin chawhnu lamah phei chuan Kristian Naupang Pawl (KNP) inkhawm pawh kohhran lamin thulh a nih thu an puang. Lunglei khawpuiah thliin thil tihchhiat lian tham a neih hriat a ni lo

Lunglei Dist chhungah chuan Thaizawl khuaah thawk na zualin biakin bakah mimal in thenkhat a tichhia a. Biakin chung zatve chu thli hian a hawk a, hei bakah hian he khawbul a raltlan camp engemawzat thliin tichhiain raltlante hi Thaizawl khawtlang hruaitute’n Sikulah leh YMA hall ah dah khawmin VC te leh YMA ten eirawng an bawl sak a ni. 

Thaizawl ah hian ruah sur leh thli tleh avanga mahni in tlanchhiat san engemaw zat an awm a, Lunglei Dist Disaster Management thuneitute pawhin Thaizawl hi tlawh nghalin chhiatna thlen dan an enfiah bakah a tul anga tanpuina awm thei ang te an sawipui a ni.

Cyclone Mocha chuan Mamit district chhung a chhungkaw 4 te chenna In a tih chhiat bak harsatna lian thlen a neih hriat a la ni lo. Mamit district bawrhsap leh district disaster management authority chairman lam atanga thu dawn danin Cyclone Mocha avang hian district chhung khaw 3 - Chhippui, North Sabual leh Tlangkhang khuaah te chenna in 4 a ti chhia a. Cyclone Mocha hian Chhippui khuaah nimin zing dar 7 vel khan chhungkaw 1 member 5 te chenna in a tichhia a, hei hi khawtlangin an thawmthat sak leh tawh a, North Sabual khuaah nimin chawhma dar 10 leh a chanve vel khan chenna in 2, chhungkaw member 12 te chenna chu a tichh bawk. 

Tlangkhang khuaah nimin chawhma dar 11:00 vel khan chhungkaw 1 member 5 chenna in tichhia in thawm ţhat a la ni lova, heng chhiatna hrang hrang thlengah te hian mihring thi leh hliam an awm lo a ni.