ZALEN July 27, 2026: SIR 2026 chungchangah vawiin khan DC Mamit Conference Hall-ah meeting neih a ni a, Lalnunfela Chawngthu Election Officer chuan a kaihruai a, Election Officer hi Lalchhanhima, ERO, Hachhek, N. Lalzarzova, ERO, Dampa leh Carolyn LB Khiangte, ERO, Mamit ten an tawiawm. Central YMA atangin Prof Malsawmliana, General Secretary leh Er. H. Duhkima Treasurer bakah CEC 11, Sub-Hqrs YMA Mamit Office Bearers, Chhawrpial Group, Airport Group, Langkaih Group leh Taitesena Group hruaitute an tel bawk.

Prof. Malsawmliana chuan SIR 2026 kalpui mek hi YMA in a ngaihpawimawh thu sawiin SIR-ah hian State dangah chuan mi nuai tel an paih thu sawiin tuna SIR neih chhoh mekah hian Branch YMA hruaitute pawh a theih anga Election hotute thawhpui tura ngen an nih thu leh NGO Coordination Committee pawhin a ngaihpawimawh thu a sawi bawk.

Sawma chuan SIR 2026 draft roll chu ngaithatthlak loh a thu a sawi. He roll ah hian khua leh tui dik tak thun tur a nih rualin foreigners lut tur te engtinnge an dan theih ang tih leh hearing neih turah hian hnam rilru pu a thawh ho a ngaih thu a sawiin tanho puiah Election hotute a sawm.

AERO te chu dik taka ding ngam tur leh mi diklo te thun an nih loh nan huaisen taka tang ngam turin a ngen a, Election Official te lamah YMA an din tur thu a sawi.

H. Darhmingliana, President, Sub- Hqrs Mamit pawhin EO te nen an thawh ho that thu sawiin hnamdang ten lehkha pawimawh Birth certificate an ngaihpawimawh thu a sawi a. Chakma pun chak dan erawh a rinhlelhawm thu a sawi.

Group hruaitute atangin YMA awm lohna khua a tamin heng khuaa mihring pun chak dan chu a ngaithatthlak loh thu sawi awm chu Election Official lam chuan heng khuaa hearing neih hunah Group YMA hruaitute an hrilh tur thu an sawi a ni. 

Er. H. Duhkima, Treasurer, CYMA chuan hnam tlem nih avangin chimral hlauhna a len thu sawiin hetiang karah Mizo te himna chu Sawrkar official te leh tlawmngai pawlte tanhona that vang a nih thu a sawi. SIR 2026 ah hian khua leh tui dik tak hmaih miah loha an awm theih nan leh khua leh tui diklo hum luih tum awm karah heng mite paih a SIR dik tak a nih theih nan YMA chuan a ngaihpawimawh a ni a ti.

N. Lalzarvova, ERO, Dampa A/C chuan a tel lo tura te chu an tel lo mai tur a ni ti a sawiin anni pawhin theihtawp chhuahin document pawh a dik ngei an phut thu leh fimkhur thei ang bera kalpui an tum thu a sawi.

Lalchhanhima, ERO, Hachhek A/C chuan CEO atangin YMA leh NGO ngaihpawimawh te ngaihpawimawh tura ngenna an dawn thu leh BLO fel lo te pawh an thlak thu a sawi bawk.