ZALEN November 20, 2025 : Rengzo Joint YMA Silver Jubilee chu vawiin khan Rengzo Rûn, Darchawi khua, Unakoti Dist., Tripura-ah ropui taka lawm a ni a, Central YMA General Secretary Prof. Malsâwmliana chuan Khuallian niin a hmanpui a, Silver Jubilee lungphun hawngin, YMA Flag a pawt pharh bawk.

Silver Jubilee lawmnaah hian thu sawiin Prof. Malsâwmliana chuan, "Darlong hnamten Mizo hnahthlak zinga mi an nihna inhria a, kum 2000 atanga YMA an lo din tawh chhawm nun zel a nih hi a lawmawm tak meuh meuh a. Darlong hnamte chu inlungrual taka khawsa hova hnam inpumkhatna vawng nung zel turin a chah a. Mizo fate hi kan la tlem em em a, tumah inla hrang thei kan awm lo, hnam bil te te-a kan inlakhran chuan Mizo hnam hi engtikah mah a ding chhuak dawn lo. Hnam bil te te awmkhawmin Mizo hnam lian pui a siam a nih avangin inlungrual taka kan awm a tul," a ti a. Hnam nunphung leh chin dan te, hnam lam leh ṭawng te pawh humhalh zel turin a chah bawk.

Rengzo Joint YMA-ah hian Branch 8 an awm a, member 600 bawr vel an awm bawk. Tripura Group YMA hnuaia awm an ni. Rengzo Joint YMA bakah hian Darlong Zohnahthlak Inzom (DZI) an awm bawk a. DZI huaihawt hian Pawl Kût an hmang nghal bawk.