Aizawl; Central YMA in Mizoram chhunga Nationalise Bank te an deposit neih zat leh mipuite tana loan an pekchhuah zat an zawhna chu Bank lamin an chhang thalo hle a. CYMA in June, 2014 chhunga report vek tura an ngenna ti hlawhtling thei chu Bank 22 zingah 8 chauh an ni. Central YMA General Secretary Vanlalruata chuan Bank thenkhat deposit duh si a, mahse loan pechhuak tha duhlo leh an scheme pawh mipui hnena puangzar duhlo an awm avangin YMA chuan loh theihlohin hma a la tih a sawi a. Mizoram ah investor lian an awm ve lo tih sawiin Bank te hian titha duh se chuan investor dang an ngaih a rinawmloh tih a sawi a, "Bank te hian vaibelchhe 10 chauh pawh mipuite tan luanchhuah tir se, kan state in hma a sawn phah dawn a, mahse an ti duh tlat lo hi a thinrimthlak a ni," a ti. Bank thenkhat ten recovery thatloh chhuanlama loan an pechhuak duhlo chu thil kalphung a nilo tih sawiin, "state dangah pawh recovery thatlohna tam tak a awm chungin loan an pechhuak reng a, Mizoram anih vanga an pechhuak tha duhlo hi hriatthiam har kan ti a. Bank te pawn risk an lak a ngaih chang a awm a, an hloh chang pawh a awm tur a ni a. Bank hi hmang tangkai thei ila, sawrkara innghat lutuk lo hian a awm theih a ni," a ti bawk. Mizoram ah tualchhung Bank- MRB, Apex leh MUCO Bank tovin Bank 22 an awm a, heng zinga 8 hian YMA zawhna hi an chhang a. Zawhna chhangtu Bank 2 te chhanna hi a mumallo a, a dang 6 te chhanna atanga a lan danin an deposit tlingkhawm hi vaibelchhe 90 a tling a ni.