ZALEN December 6, 2025: Central YMA hruaitute chuan NHIDCL hnuaia Short Term Maintenance Contract (SMTC) Vairengte atanga Sairang thleng an thawh mek chu vawiin khan a hmunah kalin an hnathawh an en a, Contractor te hnathawh mek chu a lungawi thlak loh hle niin Central YMA hruaitu te chuan an sawi. 

Vairengte atanga Sairang in kar hi NHIDCL hnuaiah contractor 3 in open tender-a chhangin an July 2025 atanga thawk tanin July 2026 a thawh zawh tur a ni a. Central YMA hruaitute chuan tun thleng hian Contractor-te hian an thawh tur ang zat ve pawh an la thawk lo vek ni a an hmuh thu an sawi bawk. 

Central YMA hruaitute chuan NHIDCL hotute leh Contractor te chu nakum fur ruah tui thlak hma ngeia an hna zo vek tura hrilhin, an vil zui zel tur thu an hrilh a ni. 

Central YMA hruaituten November 8, 2025 a an kal hma ai chuan hna pawh an lo thawk ve viau chuan an hria a. Hei aia nasa leh zuala chaka hna thawk turin an contractor te hi an hrilh a. Kar leh Thawhtanni atangin Sairang lam atanga hna thawk tan ve nghal turin Jain Infratech Co. hotute chu an hrilh bawk. 

Central YMA hruaitute hi an Vice President, Prof Lalnuntluanga'n hovin Treasurer Er. H Duhkima leh Fin. Secy. MS Ralte leh CEC mi 5 te kalin Sub-Hqtrs YMA Kolasib hruaitute, Awithangpa Group YMA hruaitute bakah Khamrang Br YMA hruaituten an lo tawiawm a. NHIDCL atangin Kolasib PMU Gen. Manager leh Manager dangte bakah Contractor Prog. Manager ten an hnathawhna hmunah theuh an lo dawngsawng a ni. 

Central YMA hruaitute chuan remchang hmasa berah Krismas hma ngeiin a hmunah tlawh leh an la tum thu an sawi bawk.