Aizawl; Central YMA-in Aizawl khawpui chhunga dan loa sumdawngte inchin fel hun a bituk hun tiam chu a zo tawh a. La inchingfello te lakah tunkar chho atang hian an dawr kalhsak thlengin hmalakna an kalpui dawn.

Central YMA President R. Lalngheta hnen atanga ZALEN thudawn danin, tuna YMA hmalakna chu in sakna bungrua (cement, rod, balu etc.) zuarte bik chauh a la ni a. Ni 30 chhung inchin felna hun an pek chhungin inching fel awm mah se, a ngai ang renga sumdawnna kalpui pawh eng emaw zah an la awm.

Central YMA president chuan inching fel an awm laiin, inching fel lo an la tam thu te, mi bum tum te pawh an la awm thu te sawiin, chung mite chu tun hnai ni hnih chhung emaw velin branch YMA ten an lo enfiah ang a, chuta dik lote chu tun kar chhungin an dawr kalhsak an ni ang.

Tar lan tawh angin, Central YMA chuan April 10, 2023 khan in sakna bungrua (cement, iron rod, brick etc.) zuartute an ko khawm a. Hnam dang, Mizo hming hawha sumdawngte chungchang leh Mizo, sumdawnna atana hnam dang an hming hawhtir thintute chungchang bakah iron rod size tling lo zawrh chungchangte insakna bungraw zuartute hi an sawipui a ni.

Mizo hming hawha sumdawnna tihtawp thuai a nih theihna atan chak taka hmalak an tum thu CYMA hruaitute chuan sumdawngte hi an hrilh a. Hnam dang, Mizo hming hawha sumdawngte leh Mizo, sumdawnna atana an hming hnam dang hawhtirtute chu April 10 atanga chhiara ni 30 chhunga inching fel ngei turin a lo ngen tawh.