Aizawl; Central YMA huaihawtin Zirtawpni zan khan Aizawl khawpui chhung leh Mizoram hmun hrang hrangah ILP check runpui neih a ni a, hriat theih hnuhnung berah mi 500 chuang ILP nei mumallo man an ni a, heng mite hi Police kutah hlan an ni. Central YMA Vice President leh kumpuan chairman ni bawk Vanlalrema Rokhum sawi danin, ILP check runpui neih hi Aizawl khawpui chhung mai bakah Mizoram hmun hrang hranga YMA Branch ten thawkin, ILP nei mumallo a Mizoram a awm an tam thu leh zan khat a an man chhuah ringawt pawh an thahnem hle tih a sawi a, hemi chungchangah hian Mizo mipuiten thiamlohna chen pawh kan nei ve niin a sawi a. "ILP nei mumallo tih kan hriat reng te In kan luahtir reng duh a, hnathawkah pawh kan chhawr duh reng a, hemi chungchangah hian inenfiahna tur kan ngah hle," tiin a sawi. Central YMA huaihawta Aizawl leh hmun thenkhata ILP check runpui neih a nih avang hian Police Lock-up hrang hrangte chu Zirtawp zan khan a khat hneh hlawm hle a, Champhai PS ah chuan ILP neilo man an awm lo thung. CYMA kumpuan chairman Vanlalrema Rokhum chuan an hmalakna chu YMA kumpuan 'Ram leh Hnam Humhalh' beihpui thlakna kal zel a ni tih a sawi a. ILP nei mumallo a hnamdang inhlawhfa a awmte bik chauh tunah rih chuan an dap tih sawiin, a remchan dan angin vai sumdawngte pawh an ILP check chhunzawm zel an tum dawn niin a sawi bawk. YMA in Police kuta ILP nei lo an hlan zat Aizawl PS 83 Bawngkawn PS 78 Kulikawn PS 42 Vaivakawn PS 19 Zonuam OP 15 Lunglei PS 85 KolasibPS 51 Serchhip PS 37 Vairengte PS 9 Mamit PS 7 Champhai PS Nil