Aizawl: Central YMA hnuaia Training & Youth Affairs hmalakna in Mizo thalai 838 te chu cement, tile leh aluminium training pek an ni tawh a, training chhuak te hian hna an hmu/thawk nghal zel niin an sawi. Central YMA chuan Mizorama hnathawh tur tam tak, ram leilung faten an thawh ve theih tho si chu hnamdang ten an thawk mek nia hriain thalaite tuaithar nan a tirah cement mistiri training a kalpui a, mi 776 chuan cement mistiri training hi an zo tawh a. Hemi hnu hian floor tile training nei lehin mi 26 an training chhuak leh a, February thla khan aluminium training thawh khatna neiin mi 36 ten tha taka an zawh hnuah tunah hian mi 60 in aluminium training hi an nei leh mek a ni. Central YMA hnuaia Training & Youth Affairs sub committee Secretary Lalthanfela chuan Mizo thalaite tan training an buatsaih chhan ber chu 'Ram leh hnam humhalhna atan te, mahni intodelh nan leh Mizoram sum tam tak, hmundanga luangral tur humna atan te' ani tih a sawi a. Thalai training ten thahnem an ngai tih sawiin Inrinni leh Chapchar Kut ni ah te pawh an kal thin tih a sawi bawk. Central YMA in training a buatsaih ah hian senso leh hmanrua hi Mizoram Building & Others Construction Welfare Board in a tum a, a hmun hma hi YMA lamin an tum ve thung a ni.