ZALEN May 26, 2026: Central YMA Executive Committee chu Central YMA Committee Room, Tuikhuahtlang ah nizan khan neih a ni a, President R. Lalngheta chuan a kaihruai a, member 61 an kal. LPG gas tih chingpen leh dan lova sumdawngte chungchang te chuan thu ngaihtuah zinga a langsar.

Mizoram mamawh LPG phurtuten kawng lakah an lo ti chingpen thin chu ngaimawhawm an ti a, a tul anga hmalak nise an ti a. Gas Agency te pawh kawm nise an ti. Mizorama dan lova hnamdang sumdawngte chungchangah nasa zawka hmalak nise, Branch YMA te an huamchhung theuhvah chak zawka hmala tur leh hetiang mi dap chhuak tura inngen nise an ti bawk.

Meeting ah hian kumin YMA Day vawi 91-na pualin India ram hmun thenkhata Mizo Welfare 19 leh Damdawi In thenkhatah Chibai bukna pek nise an ti a, hei bakah hian TBCC, OKM leh TNT ah te Buhfai pek tum a ni a. YMA Day pual hian TBCC ah Health Clinic neih tum a ni bawk.

Electoral Roll endikna runpui, Special Intensive Revision ( SIR) neih turah khua leh tui dik tak ten an chanvo an neih ngei theihnan leh Electoral Roll dik leh rintlak kan neih theihnan theihtawp chhuah nise an ti. 

YMA Rorel Inkhawm vawi 5-na, October 22,2026 a neih turah inbuatsaihna atan mawhphurhna hrang hrangte inruat a ni bawk. 

Kumin August thla chhungin Inter- Branch YMA Beat Contest buatsaih nise tiin an rel bawk a, September thlaah Mizo Infiamna hmanga Branch inelna buatsaih turin an lo rel tawh bawk a ni.