Aizawl: Central YMA chuan Mizoram sawrkarin Inner Line Permit a pek chhuah dan chu tihdanglama ennawn an duh.   Zalen palaiin a biakna ah Central YMA President Vanlalruata chuan, "Chatlak awm lova ni tin maia ILP pek chhuah reng mai hi dik lo kan ti a. ILP holiday te hi awm vein thla khat emaw chawlhte hi awm ve se kan duh a ni,” a ti.   Central YMA President chuan Home Department-in police canteen hawngtute tana sumdawn phalna, ILP a pe chu tha lo a tih thu a sawi a. Hei mai bakah ILP sponsor-tuten an ngaihsak lo te, address chiang lo lutuk leh a hmanna tur anga hmang lo an awm thin chu ngaimawhawm a tih thu Zalen a hrilh bawk.   Central YMA Vice President R.Lalngheta pawhin ramria ILP pek dan chu tihdanglam ngai nia a hriat thu a sawi bawk a. “Photo ID leh Adhaar card xerox neite hnenah Rs. 130 chawiin temporary ILP an pe zung zung mai a, hetiang ringawt maia kalpui hi chu kan hnam tan hian a him lo a ni,” a ti bawk.   Mi thenkhat ILP lei leh hralh an awm nia sawi chungchangah Central YMA hruaitute chuan tunhma deuh khan Dawrpui venga cheng Islam-a tia koh chuan ILP hi a rukin a lo siam tih sawiin amah hi Silchar lamah a tlanbo tih an sawi a. Tun hnuah chuan ILP lem siam an awm an hriat tawh loh thu an sawi.