Aizawl; Central YMA chuan Covid 19 hripui leng in hluar lam a pan zel vangin 'Total Lockdown' neih leh an duh a, he an duhna hi vawiin chawhnu dar 2 a Health minister hova thutkhawm ah an thlen dawn.

Central YMA President Vanlalruata hnen atanga ZALEN thudawn danin, Mizoram ah nitin hrikai an pun zel avangte, hri kai te enkawlna hmun turah pawh indaihlohna a nasat chhoh zel avangin Central YMA chuan Total Lockdown kalpui leh tha a ti a. He an duhna hi vawiin Health minister hova thutkhawm neih turah an thlen ang.

State Disaster Management Authority hnuaia State Executive Committee (SEC) chuan June 29, 2021 zan khan Covid 19 dona a inkaihhruaina, Standard Operating Procedure (SOP) thar a tichhuak a, June ni 30, zing dar 4 atanga July 15, 2021 zanlai dar 12 thlenga hman tur a ni.

Vawiin a Health minister hova thutkhawm ah hian July 16, 2021 atanga inkaihhruaina thar hman tur chungchang sawiho a nih rin a ni.